Vladimir Gjuta ka thënë se armën dhe një dorezë hekuri që i kishte me vete kur u arrestua para selisë së PS, i mbante për siguri dhe jo për ndonjë ngjarje.
“Armën dhe dorezën i kisha për vetëmbrojtje dhe për të ruajtur paratë”, është shprehur Gjuta, tha një zyrtar i policisë për gazetaren Anila Hoxha.
Më tej Gjuta ka deklaruar “paratë janë të miat dhe të familjes dhe unë gjendesha aty për t’i thyer në dollarë, pasi kështu e kishim lënë me familjarët dhe me babanë”.
Zyrtari i policisë tregoi se Gjutës në total iu sekuestruan 121 mijë euro, 27 mijë dollarë amerikanë, 22 mijë paund dhe 664 mijë lekë, ku përfshihen edhe shumat që ju gjetën në banesë.
Vladimir Gjuta pritet të dalë për masë sigurie për tre vepra dhe konkretisht për pastrim të parave, armëmbajtje pa leje, mbajtje e armëve të ftohta (doreza).
Pistoleta dhe 23 fishekët tha një burim i laboratorit të kriminalistikës janë dërguar për ekspertim balistik për të saktësuar nëse ishte apo jo kjo armë në gjendje të rregullt. /tch/
