Edhe këtë të martë e ashtuquajtura çështja “Xhafaj” u ngrit nga përfaqësuesit e opozitës në komisione.
Në mbledhjen e Komsionit të Ekonomisë, kryetari Erjon Braçe ka ironizuar me përfaqësuesit e opozitës.
Referuar publikimit të materialeve të tjera mbrëmjen e së hënës, në të cilat nuk kishte asnjë provë të re dhe bindëse, Braçe ka thumbuar deputetët e PD.
“Gazetari doli dje dhe tha nuk di asgjë. Unë mezi prita dje në darkë për të parë videon, dhe e pashë videon…(qesh)”, tha Braçe.
Por pavarësisht se në materialet e publikuara nuk vërtetohet asgjë nga ato që pretendohen, deputeti i PD Agron Shehaj tha se vetëm në Shqipëri ndodh që të sulmohet gazetari që nxjerr prova.
“Vetëm në Shqipëri ndodh që kur një gazetar nxjerrr prova, qeveria përndjek gazetarin. U deshën katër vite për të vërtetuar me prova përfshirjen në trafik të ministrit të parë, në më pak se një vit u vërtetuan akuzat për minsitrin e dytë. Rama duhet të shkarkojë sa më shpejt Ministrin e Brendshëm”, tha ai./a.m.
