Kreu i Grupit Parlamentar të Partisë Socialiste, Taulant Balla, vlerëson metodologjinë e re të zgjerimit, të publikuar sot nga Komisioni Evropian, duke thënë se iu ofroi vendeve të Ballkanit Perëndimor një plan të besueshëm dhe të bazuar në meritën individuale të secilit vend.
Përmes një mesazhi në Facebook, numri dy i PS shkruan se metodologjia e re e zgjerimit zgjidh hezitimin e tetorit të shkuar të ndonjë prej vendeve anëtare të BE.
“Sot Komisioni Europian, përmes Metodologjisë së re të Zgjerimit, na ofroi ne vendeve të Ballkanit Perëndimor një plan të besueshëm dhe të bazuar në meritën individuale të secilit prej gjashtë vendeve tona. Komisioni Europian rikonfirmoi sot vlerësimin e qartë se Shqipëria🇦🇱 dhe Maqedonia e Veriut🇲🇰 janë gati për të filluar menjëherë bisedimet për anëtarësim me Bashkimin Europian🇪🇺.
Metodologjia e re e Zgjerimit zgjidh gjithashtu edhe hezitimin e tetorit të shkuar të ndonjë prej vendeve anëtare të BE, pozicioni i të cilave divergjoi mbi shpejtësinë dhe axhendën e procesit”, shkruan Balla.
Më tej ai shton se, “Është tashmë në kredibilitetin e BE, që Këshilli Europian i fund-Marsit të miratojë fillimin e bisedimeve për anëtarësim me Shqipërinë dhe Maqedoninë e Veriut. Është e domosdoshme gjithashtu që Kosova dhe Bosnje-Herzegovina të progresojnë nga kandidate potenciale në vende kandidate për anëtarësim në Bashkimin Europian. Është mungesë e kredibilitetit të BE mos-mbajtja e premtimit për heqjen e vizave për qytetarët e Kosovës”.
/a.r
