Kryetari i Parlamentit Ilir Meta doli në mbështetje të ministres së Integrimit Klajda Gjosha e cila një ditë më parë tha se vendi ynë duhet të jetë i gatshëm për të pritur emigrantët që vijnë nga Siria.
Por, kjo deklaratë duket se nuk i pëlqeu kryeministrit Edi Rama i cili tha një ditë më parë se Shqipëria do të japë kontributin e vet por nuk do t’i hapë dyert për aq kohë sa vendet e Evropës “t’ja hedhin njëra-tjetrës”.
Ndërkohë Meta i pyetur për këtë deklaratë tha se vendi ynë duhet të jetë i gatshëm për të kontribuuar në çdo situatë.
Lidhur me incidentet e një dite më parë në Kuvend, Meta tha se do të respektohet rregullorja sa i takon kërkesës së grupit të PS për përjashtimin e 3 deputetëve të Partisë Demokratike.
“Të mos ecim me paragjykime dhe ultimatume. Qytetarët tanë nuk meritojnë këto lloj shfaqjesh dhe konfliktesh që nxjerrin nga vëmendja problemet e tyre dhe shpërqëndrojnë aktorët politikë nga reformat kryesore me të cilat duhet të ballafaqohemi dhe t’i çojmë përpara. Kërkohet një klimë bashkëpunimi, përgjegjshmërie dhe një etikë tjetër.” -deklaroi Meta.
