Presidenti Ilir Meta ka reaguar përmes zëdhënësit të Presidencës për ngjarjen në Bularat. Në deklaratë nuk thuhet asnjë fjalë për ekstremistin i cili me armë qëllonte ndaj policisë shqiptare. Kreu i shtetit dukshëm përpiqet të fajësojë të dy palët duke u kërkuar që të rrinë larg ‘toneve nacionaliste’! Ngjarja në thelb s’ka asnjë lidhje me nacionalizmin, pasi është thjeshtë një ngjarje kriminale ku një njeri humbet jetën si pasojë e veprimeve të tij ekstreme duke shkelur çdo lloj ligji në përpjekje për të vrarë policët shqiptarë. Meta i ka dhënë deklaratës së tij tone politike, në një kohë që ngjarja është thjeshtë një shkelje e pastër e ligjit. Në deklaratën e Metës nuk thuhet asnjë fjalë për policët shqiptarë që rrezikuan jetën.
Njoftimi i Presidencës
Presidenti i Republikës, Sh.T.Z Ilir Meta, vlerëson rëndësinë e hetimeve transparente e shteruese dhe shpreh bindjen e thellë se kjo është një ngjarje e izoluar e cila nuk mund të zbehë miqësinë shqiptaro-greke.
Minoriteti grek në Shqipëri dhe emigrantët shqiptarë në Greqi do vazhdojnë të jenë ura solide të këtyre marrëdhënieve dhe kësaj miqësie.
Presidenti Meta vlerëson qëndrimet e ministres së Kulturës së Greqisë lidhur me ngjarjen dhe ju bën apel të gjithëve të qëndrojnë larg përpjekjeve për të shfrytëzuar këtë ngjarje për retorikë nacionaliste e nevoja politike destruktive.
Në të njëjtën kohë Presidenti Meta thekson se parulla e shfaqur dje në shkallët e stadiumit “Selman Stërmasi” gjatë ndeshjes Partizani-Skënderbeu është jo vetëm e papranueshme, por thellësisht e dënueshme.
Një parullë e tillë antisportive dhe raciste është edhe një fyerje për korifenjtë e futbollit shqiptar që nderuan fanellën e ekipit tonë kombëtar duke patur kombësinë greke.
Sidoqoftë këto ngjarje të izoluara duhet të na shërbejnë si një këmbanë alarmi për të parandaluar dhe frenuar që në gjenezë pasojat e gjuhës së urrejtjes mes popujve tanë.
ma.me/javanews.al
