Presidenti Ilir Meta ka shprehur shqetësimin për ngjarjet kriminale të ditëve të para të vitit 2022, e sidomos ka dënuar ngjarjen e rëndë të së martës në zonën e Don Boskos në Tiranë, ku 1 person u vra dhe 4 të tjerë mbetën të plagosur.
Në një reagim në rrjetet sociale, kreu i shtetit e konsideron kërcënim të rëndë për jetën e qytetarëve dhe sfidë të hapur ndaj shtetit të grupeve kriminale masakrën që ndodhi në Don Bosko.
Presidenti u bën thirrje institucioneve ligjzbatuese që të arrestojnë autorët e ngjarjes së rëndë dhe të parandalojnë akte të tilla kriminale.
Presidenti Ilir Meta: “Dënoj me forcë ngjarjet kriminale të ditëve të fundvitit dhe të ditëve të para të vitit të ri, të ndodhura në disa qytete të vendit, e veçanërisht ngjarjen fatale në rrugën “Don Bosko”, në Tiranë, ditën e djeshme, që përfundoi me vrasjen e një shtetasi dhe plagosjen e disa të tjerëve. Një akt i tillë kriminal, në një nga zonat më të populluara të kryeqytetit, jo vetëm përbën një sfidë të hapur të grupeve të krimit të organizuar ndaj shtetit dhe institucioneve të tij, por edhe një kërcënim të rëndë për sigurinë dhe për vetë jetën e qytetarëve të Tiranës.
Kjo është rrjedhojë e një sërë aktesh të tjera kriminale, që kanë mbetur të pazbuluara dhe ku autorët nuk janë vënë përpara drejtësisë.
I bëj thirrje Policisë së Shtetit, si dhe të gjithë institucioneve ligjzbatuese në vend, të forcojnë punën, së pari për arrestimin e autorëve të këtij krimi të rëndë, por edhe për të forcuar bashkëpunimin ndërmjet tyre për të parandaluar ngjarje të tilla në të ardhmen”.
/a.r
