Kryetari i Partisë së Lirisë Ilir Meta, ka paraqitur 7 propozime për të përmirësuar situatën në arsimin shqiptar.
Ai u shpreh se duhet të ndalohet largimi i trurit dhe forcave më krijuese të shoqërisë duke u ofruar të rinjve dhe të mirëarsimuarve më shumë shpresë e alternativa pune, që plotësojnë pritshmërinë e tyre dhe që zhvillojnë ekonominë e vendit.
Ai ka akuzuar qeverinë se inauguron godina e fasada në vend të reformave, pasi kanë qëllim vjedhjen edhe në këtë sektor.
“Se paratë shkojnë atje ku vidhen më lehtë, ndërkohë që duhet të shkonin për arsimin, subvencionimin e studentëve, rritjen e pagave të mësuesve dhe pedagogëve.
Kësaj qeverie as nuk i bëhet vonë për arsimin. Sa herë flitet për arsimin, qeveria flet për godina jo reforma të qëndrueshme e cilësore.
Shohim që investohet e bëhen inaugurime fasadash, se qëllimi kryesor edhe në arsim është vjedhja”, tha Meta.
Propozimi:
1. Kuvendi të miratojë sa më parë një ligj për nivelin dysheme të investimit në arsim dhe kërkim shkencor në nivelin 5% të PBB. Aktualisht, buxheti i vitit 2024 financon në vlerën 2.29% e PBB, më i ulëti në rajon dhe i pamjaftueshëm për të adresuar problemet e shumta të arsimit, që kanë ardhur duke u shtuar. Me buxhetin e duhur dhe politika adekuate mund ta nxjerrim arsimin shqiptar nga gropa ku ka rënë.
2. Niveli i pagave të mësuesve në piramidën e pagave të miratohet me ligj me shumicë të cilësuar.
Nuk mjafton një maxhorancë e thjeshtë për vendime kaq të rëndësishme që prekin direkt të ardhmen e arsimit dhe rrjedhimisht edhe të vendit.
3. Kuvendi të vendosë nivel dysheme për financimin e inovacionit. Aktualisht, inovacioni në Shqipëri financohet në masën 0.05% e PBB, ndërkohë që mesatarja e Bashkimit Europian është 2.2%. Rritja e financimit është hapi i parë konkret në këtë drejtim, ku deri tani ka vepruar vetëm propaganda boshe.
4. Ligjet kryesore të arsimit të miratohen me shumicë të cilësuar në Parlament. Gjithashtu me shumicë të cilësuar duhet të miratohen edhe strategjitë e arsimit, programet, kurrikulat, dhe politikat arsimore. Për vendime kaq jetike për vendin është e domosdoshme dakordësia e të gjithëve.
5. Mësuesia dhe shkenca duhet të konsiderohen degë prioritare. Si rrjedhojë, ato duhen trajtuar me iniciativa dhe praktika që nxisin motivimin e studentëve. Për shkak të braktisjes së këtyre degëve sot, rrezikojmë që në pak vite të mbetemi pa mësues.
6. Investime prioritare në degët e teknologjisë së informacionit. Ky sektor që është kthyer në sfidë të kohës kërkon përgatitjen e profesionistëve të zotë.
7. Arsimi Profesional duhet të jetë domosdoshmërisht në varësi të Ministrisë së Arsimit. Lidhur me domosdoshmërinë e reformimit të tij, duhen studime të thelluara tregu mbi kërkesën dhe nevojën që ka sot vendi. Duhen hartuar strategji të reja që harmonizojnë kërkesat e një tregu gjithnjë në zhvillim me profesionistët që përgatisin këto shkolla. Me prioritet duhen parë degët si: elektroauto, mekanik, elektricist, teknik të pajisjeve teknologjike, turizëm dhe shërbime. Aktualisht, shkollat profesionale nuk përgatisin të rinj të aftë për të hyrë pas studimeve direkt në tregun e punës.
/f.s
