Në kuadër të Konferencës së Kryeparlamentarëve të vendeve të Bashkimit Evropian në Romë, Kryetari i Kuvendit Ilir Meta takoi Kryetarin e Kongresit të Deputetëve të Spanjës Jesus Posada.
Dy kryetarët, vlerësuan se të dy Parlamentet duhet të intensifikojnë shkëmbimet dhe bashkëpunimin e tyre në interes të forcimit të marrëdhënieve që ekzistojnë mes Shqipërisë dhe Spanjës.
Posada vuri në dukje se nga Kongresi i Deputetëve të Spanjës ka një interes të madh për të zhvilluar një bashkëpunim më të ngushtë me Kuvendin e Shqipërisë dhe në këtë drejtim e ftoi Kryetarin Meta për një vizitë zyrtare në Madrid, ftesë e cila u pranua me kënaqësi.
Nga ana e tij Meta u shpreh se ndjenjat e miqësisë së fortë mes popullit shqiptar dhe atij spanjoll duhen përkthyer në një program bashkëpunimi politik dhe ekonomik më të dukshëm mes dy vendeve dhe në këtë drejtim rikonfirmoi gjithashtu ftesën e tij ndaj homologut Posada për një vizitë zyrtare në Tiranë, e cila u mirëprit gjithashtu me kënaqësi.
Në përfundim, Meta i shprehu Posadas qëndrimin e Shqipërisë për një përqasje dhe përkushtim edhe më angazhues të Spanjës ndaj Kosovës si një kontribut për stabilitetin e rajonit të Ballkanit, duke e konsideruar pavarësinë e saj si një realitet të pakthyeshëm e si një zhvillim pozitiv për tërë rajonin.
Redaksia Online
(Javanews.al)
