Nga Spartak Ngjela
Doli dhe Meta më në fund.
Çudia më e madhe ishte se qe shume i trembur, i drobitur, por nënteksti i asaj që tha ishte synim për të trembur Ramën. Titulli i kësaj novele mund të jetë: “i tremburi që kërkon të trembë”. Kishte marrë fund. Ai nuk kuptohej se çfarë kërkonte: nuk ia mbante të thosh që nuk e votoj Reformën, por duke menduar se tremb Ramën me pushtetin e humbur, kërkoi që, pas miratimit të Reformës, të cilën ai nuk e voton dot kundër, vendi duhet të kalojë në qeveri teknike.
Në fakt ky është stili i Sali ziut. Kurse Rama e ka në favor çdo lloj zgjedhje elektorale pas Reformës. Sepse del triumfues, bashkë me Uashingtonin. Pse aleatin e Uashingtonit do të mundin këta derëzes e punëzes? As sa një katërmbëdhjetëvjecar nuk kanë aftësi që të mendojne, pavarësisht se i shtrëngon të dy i njejti hall.
Po ç’janë këta kalamaj që përditë e më shumë forcojnë Ramën! Ku humbet më Rama kështu siç erdhën punët. Meta dhe Berisha, pasi u paraqitën si antiamerikanë, vërtet mendojnë se mund të kenë të ardhme politike në këtë vend?
Si mund të trembet Rama nga të tremburit, dhe kur ka edhe Ushingtonin me vete? Por qepja më e trashë ishte fraza prej një injoranti kur mendoi që, me “destabilizim të Shqipërise” mund të trembë edhe poltikën amerikane. Meta tha në ligjëratë të drejtë: “miratimi pa konsensus, por me vota parlamentare”, destabilizon vendin. Po pse, ore i vobegët nga mendimi, me hobejtë e Fushëkrujës dhe me gurët e guroreve të Skraparit, do të trembni ju Amerikën?
Që kjo është një komedi, tani e kupton gjithkush. Por ajo që të bën përshtypje është kokëtrashësia e vjedhësve që mendojnë se mund ta mbajnë gjënë e vjedhur me kokëngjeshje. Asgjë nuk ndodh më në Shqipëri, por i gjori Meta mendon se ata që e degjojnë, janë fëmijë.
Nuk ke forcë Meta; dhe mirë ke bërë që je nënshtruar për ta votuar Reformën, pastaj, e tremb ose jo Ramën, kjo ka lidhje me politikën amerikanë dhe gjermane. Dëgjoji me vëmendje, dhe gjermanët që do flasin këto ditë.
Koha e ka mbyllur në favor të shqiptarëve zhvillimin e Shqipërisë. Shqiptarët kanë kohën me vete: ja, ky është sekreti i këtyre ditëve, dhe i të gjithë periudhës që vjen pas 21 korrikut.
