Një e majtë e bashkuar fiton gjithmonë bindshëm. Ky ka qenë një nga mesazhet kryesore që kryetari i LSI-së, Ilir Meta, dhe njëkohësisht edhe kryatar i Kuvendit ka dhënë në Kongresin e PS-së. Ai ka kujtuar momentet e veçanta të marrëveshjes së realizuar 3 vjet më parë mes PS dhe LSI, me nxitjen e socialistëve europian për krijimin e “Aleancës për Shqipërinë Europiane.
“Kjo aleancë ka arritur dy fitore bindëse fitoren në zgjedhjet e përgjithshme dhe ato lokale. Kur e majta është bashkë fiton bindshëm. Ka mjaft arësye për të qenë krenarë për një sërë arritjesh që kanë bërë të mundur që vendi të pësojë ndryshime të rëndëisshme, që vendi të kalonte kolapsin financiar që rrezikonte. Ishin këto reforma të bëra në kushte mjaft të vështira në ekonomi, energji, siguri, shërbime publike që vendi ynë të meritonte staktusin e vendit kandidat për në BE”, ka theksuar Meta.
Kryeparlamentari ka nënvizuar se vendi ndodhet në këto momente në një pikë mjaft të rëndësishme që ka të bëjë me finalizimin e Reformës në Drejtësi, për të garantuar vijueshmërinë e reformave në vend.
“Duke realizuar këtë reformë dhe duke miratuar pakëtën kushtetuese do të japim mesazhe të rëndësishme. Reforma administrative territoriale ishte një sukses dhe kjo duhet të vazhdojë dhe me shërbimet nga ana e pushtetarëve lokal. Reforma zgjedhore duhet të sjellë një hop tjetër cilësor. Nuk duhet të jenë thjeshtë më të mira se ato që shkuan por të sjellë standarte më të larta. Për herë të parë garantuam barazinë gjinore në zgjedhjet vendore. Hap modernizues, hap që duhet ndjekur dhe në reformën në zgjedhjet e përgjithshme. Ne besojmë jo thjeshtë te barazia gjinore, por besojmë tek fuqia e gruas dhe vajzës shqiptare”, deklaroi Meta.