Kërkesa e Presidentit të Turqisë Rexhep Tayyip Erdogan për mbylljen e shkollave të Fejtulla Gylen, kundërshtarit të tij politik, dalëngadalë po merr përgjigjen e qeverisë shqiptare.
Pas Ministres së Arsimit Lindita Nikolla ditën e sotme ku theksoi se shkollat nuk do të mbyllen për aq kohë sa plotësojnë kriteret, edhe kreu i Kuvendit Ilir Meta ka dhënë një mesazh “ndër rrjeshta” nga qeveria shqiptare.
Në fakt kreu i Kuvendit ka qenë i pranishëm në një prej kolegjeve turke të Gylen në Tiranë. Kjo për faktin se aty studion vajza e kreut të LSI-së dhe ai ka qenë aty për të parë një shfaqje të vënë në skenë nga shkolla.
Por ajo që bie në sy është se vetët kolegji në faqen në internet i ka bërë jehonë kësaj vizite të numrit dy të qeverisë.
“Kryetari i Kuvendit të Shqipërisë, Z Ilir Meta, dhe bashkëshortja e tij, Monika Kryemadhi, ishin të ftuar në kolegjin “Turgut Özal”. Ata ndoqën programin e organizuar me rastin e përfundimit të klasës së katërt të vajzës së tyre. Në sallën e madhe të koncerteve, ata u fotografuan ulur pranë me drejtorin e kolegjit, Z Huseyin Yavuz, teksa shijonin rolet e nxënësve në këtë program” – thuhet në faqen online të kolegjit.
Mos vallë kjo është një përgjigje për Erdogan se shkollat e Gylen në Shqipëri nuk do të mbyllen, dhe jo vetëm për faktin se plotësojnë kriteret por se aty mësojnë edhe fëmijët e politikanëve?
