Kryetar i Kuvendit, njëherësh kryetari i LSI, Ilir Meta ishte sot në një takim me të rinjtë e LRI në Shkodër. Në takim ishte edhe kandidatja e ASHE, Keti Bazhdari.
Meta duke folur për bashkitë e reja dhe punët që ato kanë nevojë të kryhen tha se tanimë nuk duhet vënë lufta politike mbi interesin qytetar,.
“Nuk ka arsye që të përdoret për të akuzuar qeverinë sepse këto janë zgjedhje lokale, për problemet e përditshme të qytetarit në lagje, në fshat , kudo që jeton. Bashkia ka përgjegjësi më tepër tani.
Nuk besoj se jeni të lumtur që Vllaznia nuk lufton për titullin kampion, dhe jo vetëm në futboll por në gjithato sporte sepse Shkodra ka shkëlqyer në të gjitha llojet e sporteve, po kështu edhe jeta kulturore e këtij qyteti me tradita të fuqishme nuk është ajo që dëshironi dhe aspironi, përveç mundësive për një punë më të sigurtë dhe dinjitoze”, theksoi Meta.
Ndërsa kandidatja Bazhdari tha se i ka hyrë kësaj gare për t’i dhënë zgjidhje problemeve të qytetit.
“Hymë për t’i dhënë zgjidhje Shkodrës, zhvillimit ekonomik të Shkodrës, dhe kemi linjat të përcaktuara mirë”, tha Bazhdari.
