Turqia mbetet një nga partnerët kryesorë ekonomikë e tregtar për Shqipërinë, deklaroi sot Presidenti i Republikës, Ilir Meta, në një takim me Ministrin e Punëve të Jashtme të Republikës së Turqisë, Mevlüt Çavuşoğlu.
Meta vlerësoi marrëdhëniet e shkëlqyera midis dy vendeve dhe shprehu mirënjohjen për ndihmën dhe mbështetjen që Turqia i ka dhënë Shqipërisë dhe shqiptarëve, veçanërisht në tre dekadat e fundit.
Duke u ndalur tek mundësitë e mëdha të bashkëpunimit ekonomik, Presidenti Meta shprehu vlerësimin për vëmendjen që Presidenti Erdoğan dhe Qeveria turke i kushtojnë këtij bashkëpunimi me Shqipërinë.
Presidenti Meta vlerësoi gjithashtu kontributin e dhënë nga Turqia përmes Agjencisë turke të Bashkëpunimit për Zhvillim, TIKA, e cila tashmë është e pranishme në të gjithë Shqipërinë.
Të dy bashkëbiseduesit i kushtuan një vëmendje të veçantë zhvillimeve më të fundit në rajonin e Ballkanit dhe nevojës për të vijuar kontributin e përbashkët në ruajtjen dhe forcimin e paqes dhe të stabilitetit në këtë rajon.
Në këtë kuadër, Presidenti Meta vlerësoi mbështetjen që Turqia ka dhënë për njohjen e pavarësisë dhe anëtarësimin e Kosovës në organizatat rajonale dhe ato ndërkombëtare.
Presidenti Meta vlerësoi gjithashtu rolin që luan Turqia në përballimin e krizës humanitare të refugjatëve sirianë dhe vendeve të tjera të Lindjes së Mesme në konflikt.
/b.d
