Kreu i Kuvendit Ilir Meta i ka dërguar një mesazh ngushëllimi familjes së komandantit të FNSH-së Simon Gjeta në Shkodër i cili u vra mbrëmë me armë zjarri nga Ruzhdi Arishta. Në mesazhin e tij kryeparlamentari Meta shpreh dhimbjen e thellë për familjen Gjeta. Meta thekson se lufta ndaj kriminalitetit ka edhe heronjtë e saj dhe mes tyre është edhe Simon Gjeta
Mesazhi i Kryetarit të Kuvendit Ilir Meta:
Kryetari i Kuvendit, z. Ilir Meta i shpreh dhimbjen e thellë dhe solidaritetin në këto momente të vështira familjes së Nënkomisar Simon Gjetës dhe të gjithë efektivëve të Policisë së Shtetit.
Lufta pa kompromis me kriminelët dhe shkelësit e ligjit ka heronjtë e saj dhe i tillë ishte dhe Simon Gjeta.
Kjo luftë do të vazhdojë dhe shteti do të triumfojë përballë të keqes për t’i garantuar qytetarëve rendin publik dhe qetësinë në familjet e tyre.
Duhet të angazhohemi të gjithë për t’i prerë rrugën të keqes dhe është detyra jonë kryesore të çojmë përpara drejtësisë të gjithë kriminelët dhe shkelësit e ligjit që ngjarje të tilla të mos përsëriten më.
I përjetshëm qoftë kujtimi dhe vepra e Nënkomisar Simon Gjetës.
