Kryetari i Lëvizjes Socializte për Integrim Ilir Meta komentoi nismën e disa deputetëve të partisë që ai drejton për disa dnryshime në ligjin për konçesionet. Ai nuk preferoi të komentojë me detaje, por tha se përfshirja e Kuvendit në verifikimin e konçesioneve që parashikohen sipas propozimeve të deputetëve do të rrisin transparencën. Ai shoit se LSI mbështet këto bashkëpunime që sjellin investime të reja.
“Lidhur me këtë iniciativë për koncesionet mendoj që zoti Vasili dhe deputetët nënshkrues mund t’ju japin sqarime më të plota. LSI mbështet të gjitha format e partneritetit publik dhe privat që sjellin investime, përmirësim të shërbimeve ndaj qytetarëve ashtu sikurse opinioni është ngarkuar mjaft në lidhje me efektivitetin e tyre. Por ky nuk është debat i sotëm, por shumë më i hershëm. Ne besojmë se pavarësisht nga qëllimet spekulative që nxisin një pjesë të debatit, për të qenë sa më racional është e rëndësishme të ecet në thellimin e transparencës dhe përfshirjen e Kuvendit kur bëhet fjalë për kontrata apo koncesione që kalojnë mandatin e një qeverie. Kjo do rrisë edhe besimin e publikut për koncesionet dhe lë më pak vend për spekulime”.
Kryeparlamentari Meta, i pyetur nga gazetarët komentoi edhe përplasjen që ka pasur Presidenca dhe Qeveria në lidhje me shkarkimin e dy ministrave dhe mos dekretimin ende të dy emrave të tjerë.
“Besoj se kemi nevojë për një klimë sa më bashkëpunuese mes institucioneve dhe Kushtetutës. Besoj se çdo gjë do ecë sipas Kushtetutës. Nuk kam arsye të jem i shqetësuar se një gjë e tillë sjell krizë mes dy institucionesh.” tha Meta.
Kreu i LSI më tej shprehu besimin për realizimin në kohë të Reformës në Drejtësi dhe ngritjen e Byrosë Kombëtare të Hetimit.
“Kam patur besim të plotë se Refoma në Drejtësi do realizohet në kohën e duhur me cilësinë e duhur, dëgjoj alarme të panevojshme. E vërteta është se e gjithë axhenda ka ecur sipas afateve të parashikuara. Ne kemi qenë dhe jemi të kushtëzuar edhe nga axhenda e Komisionit të Venecias që e kemi pranuar të gjithë faktorët dhe palët si gjykatësin më të mirë të standardeve europiane të kësaj reforme. Sa për Byronë e Hetimi ka pasur diskutime se opozita e ankimoi në Kushtetuese. Ne e kemi kërkuar edhe më parë ngritjen e saj, debati u kthye për shkak të papajtueshmërisë siç e vlerësoi Gjykata Kushtetuese. Pastaj pati disa diskutime, PD insistoi para disa javësh që të ndodhte menjëherë, kur qeveria kaloi këtë iniciativë, ata thanë se donin të prisnin opinionin përfundimtar të Komisionit të Venecias. Besoj se do realizohet në përputhje me rekomandimet e Venecias”.
