Në 1 vjetorin e manifestimit të 2 marsit, presidenti Ilir Meta thekson se misionin e nisur për rivendosjen e sovranitetit do ta çojë në fund deri më 25 prill ku bën thirrje për referendum. Ai ka kujtuar sot tubimin e një viti më parë të thirrur nga ai vetë ‘në mbrojtje të Kushtetutës dhe kundër grushtit të shtetit’, teksa ka falenderuar qytetarët që iu përgjigjën thirrjes së tij.
“Falënderim të përzemërt dhe mirënjohje të thellë, për të gjithë motrat dhe vëllezërit shqiptarë, të cilët një vit më parë ju përgjigjen thirrjes së Presidentit të Republikës, në mbrojtje të Kushtetutës dhe kundër grushtit të shtetit.
Misionin tonë, të nisur më 2 mars 2020, për rivendosjen e sovranitetit të plotë të popullit shqiptar ndaj të gjitha institucioneve, do ta çojmë deri në fund, nëpërmjet referendumit historik të 25 prillit 2021. Pranvera kuqezi po vjen“, shkruan Meta.
Një ditë më parë Meta deklaroi se do japë dorëheqjen nëse Rama fiton zgjedhjet dhe do marrë drejtimin e opozitës.
