Meta: Koalicioni me PS, reformën në drejtësi dhe Specialja në Kosovë
Kryetari i Kuvendit, Ilir Meta e konsideron mbylljen sesionit parlamentar me një bilanc pozitiv, jo vetëm për faktin se u miratuan rreth 200 akte nga të cilat 93 ligje dhe shumë vendime apo rezoluta, por edhe sepse përfundoi me kthimin e opozitës në Parlament.
Në një intervistë televizive, Kryeparlamentari shpreh besimin që opozita të kontribuojë sa më pozitivisht në avancimin e procesit të integrimit evropian.
Lidhur me procesin e dekriminalizimit, Meta nënvizon se ky duhet të jetë një proces i përbashkët ndërsa shton se “opozita nuk duhet të përdorë standarde të dyfishta. Edhe ajo duhet të shikojë edhe nga vetja për të kontribuar në këtë proces”.
Sipas tij, ky proces është i arritshëm dhe mund të zgjidhet kur ka vullnet të sinqertë politik. Ai sqaron se “në rast se do të konsiderohet se ekzistojnë pengesa të karakterit kushtetues, askush nuk do të na pengonte me vullnet për të realizuar këtë proces dhe ne nga ana jonë do të përkrahim çdo iniciativë të qartë ligjore në këtë drejtim”.
Duke u ndalur tek bilanci i zgjedhjeve vendore, Lideri i LSI-së i cilëson se zgjedhjet më të qeta dhe më paqësore të zhvilluara ndonjëherë në vendin tonë. Duke ritheksuar faktin se LSI-ja ishte luajale me partnerët në zgjedhje, Meta falënderoi edhe strukturat e PS-së për përkrahjen që u dhanë kandidatëve të LSI-së.
I pyetur lidhur me humbjen e kandidatëve të LSI-së në Lezhë, Pogradec dhe Kukës, Meta tha se “ka qenë një përpjekje për të bërë më shumë për Kukësin, për të bërë më shumë për Lezhën dhe për shumë zona të tilla të Shqipërisë. Natyrisht, fakti që janë zgjedhur kryebashkiakë demokratë nuk ka arsye pse të na pengojë, përkundrazi na motivon të vazhdojmë të punojmë për zgjidhjen e shumë problemeve qoftë edhe duke bashkëpunuar me ta, ku mendoj që hapja e aeroportit të Kukësit është mjaft e rëndësishme për popullin e Kukësit, edhe për qytetarët shqiptarë në tërësi, apo edhe vazhdimisht shumë investime në Lezhë dhe në shumë zona të tjera”.
Duke mohuar zërat për ftohje të raporteve PS-LSI, Meta deklaroi se “ne kemi qenë, jemi dhe do të vazhdojmë të jemi tepër korrekt dhe luajal në raportet tona me PS-në si forca kryesore e këtij koalicioni, por edhe me të gjithë forcat e tjera, sepse e theksoj korrektesa është baza e të gjithë suksesit e LSI-së. Korrektesa me partnerët në marrëveshje, korrektesa me anëtarët, me votuesit, me simpatizantët, me të gjithë”.
Lideri i LSI-së e konsideron me rëndësi që forca që ai drejton t’i shërbejë vendit në drejtim të qeverisjes, “LSI-ja nuk është një forcë që duhet të jetë patjetër në pushtet dhe duhet të jetë patjetër një herë me njërën dhe një herë me tjetrën apo ku di unë. LSI është një forcë që është në funksion të interesit të vendit dhe të qytetarëve shqiptarë. Interesi i qytetarëve do të prevalojë në vendimmarrjen e LSI-së”.
Në intervistën televizive, Meta u ndal edhe tek reforma në drejtësi ku theksoi se “nuk bëhet fjala për një strukturë të veçantë apo për disa kompetenca të veçanta apo për institucioneve të veçanta. Këtu bëhet fjalë për një reformë tërësore. Ky është qëllimi që do të garantojë që ky sistem të funksionojë, të jetë efiçent dhe të mos degradojë në thjesht ndryshim personash edhe lëvizje kompetencash sepse kjo nuk do t’i sillte askujt asnjë dobi dhe do të sillte një zhgënjim të madh në fund fare për qytetarët shqiptare dhe padyshim edhe për partnerët ndërkombëtarë”.
