Presidenti Ilir Meta i është përgjigjur sot homologut të tij grek, Prokopis Pavlopoulos i cili pak ditë më parë i kërkoi Tiranës zyrtare të mos e përmend më çështjen Çame.
Në një intervistë “Albanian Daily News” ai ushpreh se qëndrimet e Pavlopoulos nuk sjellin energji pozitive.
“Pavlopulos nuk është ne sintoni me Bushatin e Kotzias. Deklaratat e tij nuk i pergjigjen partneritetit. Ne duhet të ruajme qetesine dhe respektin reciprok”, tha Meta.
“Dua të nënvizoj se këto deklarata nuk janë në përputhje me mesazhet e fundit publike dhe angazhimet e Ministrave të Jashtëm, Bushati dhe Kotzias për të liruar energjitë e reja pozitive në marrëdhëniet midis dy vendeve duke trajtuar pengesat e së kaluarës me konstruktivitet. Spektri i bashkëpunimit mes dy vendeve ka një rëndësi të jashtëzakonshme jo vetëm për vendet tona, por, mbi të gjitha, për popullin dhe qytetarët tanë. Natyrisht, mund të ketë edhe çështje të caktuara mbi të cilat mund të ndajmë qëndrime të ndryshme, por kjo nuk do të thotë të humbasim qetësinë në komunikimin me njëri-tjetrin dhe të prekim bashkëpunimin e plotë dhe jetësor për të dy vendet tona dhe për njerëzit. Partneriteti nuk është thjesht një koncept dhe një dokument, por, në radhë të parë, është një mënyrë komunikimi e bazuar edhe në respektin reciprok”, deklaroi Meta.
Pak ditë më parë Pavlopoulos u shpreh se “Është e papranueshme që udhëheqja e Shqipërisë në këto momente të ngrejë çështjen çame. Përveç faktit se kjo çështje nuk ekziston, është më mirë që Shqipëria të mos kujtojë se çfarë do të thotë historia e të ashtuquajturave çamë gjatë periudhës së mizorive naziste në Greqi, nëse dëshiron të ketë ndonjë perspektivë europiane”.
Pa e fshehur gjuhën e ashpër, me të cilën po artikulonte kërcënimet për perspektivën europiane të Shqipërisë, Pavlopoulos tha se historia e çamëve në Greqi është më mirë të harrohet sesa të risillet në aktualitetin politik. “Më vjen keq që jam kaq i ashpër, por në ditë të tilla si kujtimi i holokaustit, ata guxojnë të flasin për çamët. Më mirë të mos kujtojmë historinë e atyre që u shfaqën si çamë në hapë- sirën greke”, ka deklaruar Pavlopoulos.
