Që Shqipëria është në fushatë kjo duket edhe nga seanca/seancat e Kuvendit. Ilir Meta është përfshirë në replika të ashpra me deputetin e Kukësit Flamur Noka. Situata në terren dhe sidomos sondazhet e papublikuara, por që janë në dispozicion të partive kryesore të vendit, kanë bërë të shpërthejnë akuza reciproke, të cilat më shumë se për sot, duket se do të marrin kuptim nesër.
Sherrin e fillon Noka i cili pretendon blerje votash në terren dhe Meta i përgjigjet me rrugën e drejtësisë: denonco rast pas rasti siç kam bërë dhe unë vetë, në raste të ndryshme.
Vazhdon deputeti demokrat duke pretenduar se Meta aktron për problemet e Kukësit dhe merr përgjigjen se shumë shpejt në Kukës do të vihet në funksionim aeroporti. Kryetari i Kuvendit rikujton rolin e tij edhe personal në ndërtimin e këtij aeroporti në kohën kur ishte kryeministër në fillim të viteve 2000. Dhe që andej e zbret diskutimin në terren konkret dhe në situata konkrete e shumë të ndjeshme për qytetarin: “Kemi vënë në rrugën e zgjidhjes problemin e patates së Shishtavecit. Eshtë siguruar madje dhe tregu për të”. Meta shkon dhe më tej duke e ftuar Nokën për t’i parë në sy problemet kuksiane mbas 21 qershorit. Përballë nervozizmit të krijuar në seancë, Meta ka vazhduar të përsërisë parrullën tashmë të njohur: “Me qetësi e dashuri”, ndonëse në sallë ka pasur shumë tension dhe natyrisht shumë urrejtje dhe ndarje mes palëve.
Ilir Meta, por dhe Edi Rama janë përfshirë fort në fushatën elektorale për qytetin verilindor të Kukësit. Ata kanë përzgjedhur për të konkuruar aty Hasan Halilajn, kryetarin aktual të bashkisë, të cilin për momentin, të gjitha sondazhet e nxjerrin fitues. /L. V./
