Kryetari i Kuvendit, Ilir Meta, priti paraditen e së enjtes kryeparlamentarin e Malit të Zi, Darko Pajoviç, i cili ndodhet në Tiranë për një vizitë zyrtare. Në konferencën e përbashkët për shtyp pas takimit në Kryesinë e Kuvendit, Meta shprehu mbështetjen për vendin fqinj në procesin e integrimit euroatlantik. Kreu i Kuvendit i vlerësoi si ‘model te fqinjësisë së mirë’ marrëdhëniet dypalëshe. Ai veçoi rolin e shqiptarëve në Mal të Zi, duke i konsideruar ‘një urë solide për stabilitetin e vendit’.
Kryeparlamentari bëri të ditur gjithashtu se parlamenti i Shqipërisë do ta ratifikojë sot protokollin për aderimin e Malit të Zi në NATO. “Marrëdhëniet mes Shqipërisë dhe Malit të Zi janë një model i fqinjësisë së mirë. Shqipëria e ka mbështetur integrimin euroatlantik të Malit të Zi, ndaj dhe ne sot do të votojmë në Kuvend ratifikimin e protokollit për anëtarësimin e tij në NATO. Aderimi i Malit të Zi në Aleancë ka një rol kyç për stabilitetin e vendit dhe të rajonit. Në këtë drejtim shqiptarët e Malit të Zi janë urë solide për stabilitetin e tuj”, u shpreh Meta në deklaratën për shtyp.
Ndërsa, kryeparlamentari malazez, Pajoviç, vlerësoi mbështetjen që Shqipëria ka dhënë për Malin e Zi, duke shprehur mirënjohje për miratimin e protokollit për anëtarësimin në NATO.
Shqipëria është shteti i pestë që do të ratifikojë protokollin për anëtarësim në Aleancë, tha ai. Me këtë veprim vendi juaj i dërgon një mesazh të mirë vendeve të NATO-s, që ky proces të përshpejtohet dhe të ecë në rrugën e duhur.
Së shpejti, tha Pajoviç, do të realizohet edhe një vizitë e ndërsjelltë e Metës në Malin e Zi, ku ne do të kemi mundësi t’ju kthejmë mikpritjen. Një falenderim të veçantë zyrtari i larte i drejtoi dhe misionit diplomatik malazez në Tiranë, të cilin e konsideroi një urë të rëndësishme në nxitjen e bashkëpunimit mes dy vendeve.
Vizita e kryetarit të Kuvendit te Malit te Zi do te vijoje me takimin me Presidentin e Republikes, Bujar Nishani, ndersa rreth ores 12:00 ai do t’i drejtohet me një fjalë përshëndetëse Kuvendit të Shqipërisë, i cili sot pritet të miratojë ratifikimin e Protokollit për Anëtarësimin e Malit të Zi në NATO. (java / r.a)
