Një gjykatës në shtetin amerikan të Nju Meksikos ka gjobitur kompaninë Meta me 567 milionë dollarë dëmshpërblim për dështimin në mbrojtjen e të miturve në platformat e saj, duke e çuar totalin e gjobave në këtë çështje në 942 milionë dollarë.
Gjykatësi Bryan Biedscheid e cilësoi Metën si një “shqetësim publik”, duke e krahasuar ndikimin e platformave të saj me ndotjen e ajrit. Sipas vendimit, kompania duhet të krijojë një fond për të financuar programe që synojnë trajtimin dhe parandalimin e dëmeve psikologjike dhe rreziqeve me të cilat janë përballur fëmijët në internet.
Rasti buron nga një padi e ngritur në vitin 2023 nga autoritetet e Nju Meksikos, të cilat argumentuan se algoritmet e rekomandimit të Metës i ekspozonin përdoruesit e mitur ndaj përmbajtjeve me natyrë seksuale dhe kontakteve me grabitqarë seksualë.
Meta, pronare e Facebook, Instagram, WhatsApp dhe Threads, ka bërë të ditur se nuk pajtohet me vendimin dhe se do ta apelojë atë, duke theksuar se vazhdon të investojë në masat për mbrojtjen e të rinjve dhe luftimin e përmbajtjeve të dëmshme.
Ky konsiderohet vendimi më i madh financiar kundër Metës për çështjet e sigurisë së fëmijëve dhe një nga rastet më të rëndësishme ligjore që sfidon përgjegjësinë e platformave të mediave sociale për ndikimin e tyre tek të miturit.
