Pas takimit me ambasadoren e BE në Shqipëri, Romana Vlahutin, Kryetari i Kuvendit Ilir Meta tha se largimi i Ministrit të Drejtësisë Nasip Naço, do t’i shërbejë “impulseve të reja” në qeveri.
“Ky ndryshim për të cilin dua të falënderoj z.Naço, i hapi rrugë ndryshimeve në qeveri, dhe do t’i shërbejë impulseve të reja, dhe pse jo edhe vetëm reformës në drejtësie. Po kështu le të jetë edhe si një nxitje për rritje të rolit të Ministrisë së Drejtësisë në këtë proces. Jam i bindur që është një lëvizje mjaft pozitive”, tha Ilir Meta.
Në lidhje me progres raportin për Shqipërinë, kreu kuvendit Meta tha se vendi ka bërë hapa të rëndësishëm. Reforma në drejtësi dhe procesi i dekriminalizimit për kreun e kuvendit janë dy pika kyçe. Sipas Metës pas marrjes së opinionit nga Komisioni i Venecias do të hartohen dhe shtyllat kryesore të reformave, e sidomos ajo në drejtësi.
“Nuk jam këtu për të folur ne emër të mazhorancës, megjithatë mund të them se do bëjmë gjithçka për të ecur përpara me këtë proces. Pasi të kemi dhe opinionet e komisionet të Venecias besoj se nuk do të duhet shumë kohë për të vendosur shtyllat e kësaj reforme”…Progresin e qëndrueshëm që është bërë në drejtim të avancimit të 5 prioriteteve kyçe. Shpreh kënaqësinë për vlerësimin pozitivi që bëhen ndaj parlamentit dhe punën e tij, edhe sa i takon monitorimit të institucioneve të pavarura. Ne do të kemi në konsideratë të gjitha rekomandimet që jepen për të rritur kapacitetet e Kuvendit, po edhe për një ekspertizë më efikase për të ndihmuar procesin ligjvënës, Ne jemi të vendosur për të ecur më shpejt në procesin e dekriminalizimit, dhe për të ecur përpara me reformën në drejtësi që është më rendësi për procesin e integrimit”, theksoi Meta.
