Presidenti Ilir Meta dhe ish- kryeministri Sali Berisha ndodhen të dy bashkë në Baku të Azerbajxhanit ku po marrin pjesë si të ftuar në Forumin Global. Eshtë ende e paqartë nëse do të ketë një takim mes tyre, por duke ditur komunikimin jo të vogël mes Metës dhe Berishës, ku më i fundit ishte ai ‘këshillues’ për ti dhënë autorizimin Ministrit të Jashtën Ditmir Bushati për të negociuar zyrtarisht për ‘Marrëveshjen e Detit’ me Greqinë, gjasat për një takim ‘kokë më kokë’ nuk përjashtohen. Duke pasur parasysh dinamikën e zhvillimeve politike në vend pas largimit të Adriatik Llallës, emërimit të Prokurores së Përkohshme të Përgjithshme, fillimin e funksionimit të Reformës në Drejtësi, etj., nuk përjashtohet mundësia e një takimi. ‘Menyja’ e temave për t’u diskutuar është mjaft e gjerë.
Meta
Ndërkaq Presidenti Meta është pritur në një takim të veçantë nga Presidenti Azerbajxhanit, Aliyev. Gjatë këtij takimi Meta ka vlerësuar marrëdhëniet shumë të mira mes dy vendeve. Po ashtu, kreu i shteti ka falenderuar presidentin Aliyev për mbështetjen që ia ka dhënë për projektin TAP dhe të procesit të gazifikimit të Shqipërisë.
“Të zgjerojmë bashkëpunimin dypalësh ekonomiko tregtar dhe në fushën e turizmit.” –mësohet të jetë shprehur ndër të tjera Meta.
Berisha
Ndërsa ish kryeministri Sali Berisha pritet të mbajë edhe një fjalim në sesionin me temë “Si ndikojnë Fuqitë e Reja në çështjet globale?”.
“Bota e sotme është një botë plot hendeqe, duke penguar krijimin e një shoqërie me të vërtetë gjithëpërfshirëse, të çliruar nga vështirësitë ekonomike, konfliktet e dhunshme, degradimi intelektual dhe moral. Në një botë që nuk është më njëpolare, por ku një numër fuqish botërore dhe rajonale po rriten fuqishëm, balancat po ndryshojnë duke ndikuar edhe në jetën e shoqërive të vendeve të tjera. Në këtë takim, kryetarë shtetesh aktualë dhe të mëparshëm, kryeministra, ministra dhe akademikë si dhe ekspertë të mirënjohur do të vlerësojnë gjendjen aktuale të botës dhe kërcënimet më të ngutshme të sigurisë dhe paqes ndërkombëtare dhe të sugjerojë hapa konkretë për udhëheqjen e sotme për të kapërcyer këto ndarje, në formën e një deklarate”, shkruan Berisha në faqen e tij në FB.
Sipas tij në forum marrin pjesë një numër shumë i lartë personalitetesh ndërkombëtare, përfshirë Binali Yildirim Kryeministër i Turqisë, Igor Dodon President i Moldavisë, Gjorge Ivanov President i Maqedonisë, Giorgi Kvirikashvili Kryeministër i Gjeorgjisë, Mevlut Chavushoghlu Minister i Jashtëm i Turqisë, etj. Berisha n uk e përmend prezencën e Presidentit Meta në këtë forum, pavarësisht se ka listuar një sërë presidentësh që marrin pjesë.
ma.me/javanews.al
