Kryetari i Parlamentit Ilir Meta ka deklaruar se shumë reforma nuk do të ishin realizuar nëse PS-LSI nuk do të ishin bashkë. Gjatë inspektimit të punimeve për rrugët që po rikonstrukton dhe rindërton bashkia e Tiranës në Zall Herr, Meta ka vlerësuar me superlativa punën e kryebashkiakut Veliaj. Kreu i LSI, u shpreh se Veliaj ka bërë shumë punë këto 2 vjet në Tiranë dhe punët e realizuara janë të dukshme.
“Erion Veliaj ka bërë shumë këto dy vjet për Tiranën. Besoj se puna që ka bërë Veliaj ka qenë shumë e dukshme. Shumë refomra nuk do të realizoheshin nëse nuk do të ishim bashkë. Do të korrigjojmë mangësitë tona. Kishim bashkëpunim të mirë për realizimin e projekteve. Politikanët duhet të verpojnë me vepra”, tha Meta.
Kryetari i Bashkisë së Tiranës Erion Veliaj theksoi se falë reformës territoriale, është bërë e mundur realizimi i një sërë investimesh të rëndësishme jo vetëm në zonat urbane, por edhe në zonat rurale.
“Ajo që besoj se është shumë e rëndësishme të kuptojmë është që prej këtyre reformave që i kemi bërë bashkë, si koalicion, PS dhe LSI, ne kemi arritur sot që të kemi një investim i cili do ishte i pamundur në kushtet e Zall-Herrit. Unë besoj që pavarësisht rritjes së zonës, disa zona si Krraba, Zall-Herri, Shëngjergji Peza, Ndroqi, Vaqarri do ta kishin të pamundur që vetëm me paratë e komunës, që janë taksa shumë modeste që mezi paguajnë rrogat administratës të bënin këto investime”, tha ai duke shtuar se nuk do të ketë asnjë dallim në shpërndarjen e investimeve midis qendrës dhe zonave rurale. Veliaj theksoi se kur të gjithë janë bashkë, mund të realizohen edhe gjërat e pamundura.
“Nuk duhet kurrsesi që ne të fokusohemi tek sheshi Skënderbej, tek stadium Qemal Stafa, Pazari i Ri, bulevardi i ri dhe pastaj të harrojmë që njerëzit në fakt nuk jetojnë në shesh, nuk jetojnë në bulevard, nuk jetojnë tek Pazari i Ri, njerëzit jetojnë në fshatra si Çekrez, Kasalla, dhe kjo është arsyeja pse po I bëjmë këto investime. Unë jam këtu sot bashkë me kryetarin e Kuvendit edhe si dëshmi e një fakti që kur ne jemi bashkë bëjmë gjëra që veç e veç janë të pamundura”, tha Veliaj.
I pyetur për zgjedhjen e presidentit dhe zhvillimin e zgjedhjeve, kryeparlamentari u shpreh se presidenti duhet të jetë konsensual dhe se të gjithë duhet të marrin pjesë në zgjedhje.
“Të gjithë duhet të marrin pjesë në zgjedhje. Zgjedhja e presidentit përmes konsensusit. Tani nuk kam një emër, por presidenti duhet të jetën konsensual”, deklaroi Meta./Javanews.al
c.a
