Propozimi i Partisë Socialiste për të pasur mësuesit si sekretar në Komisionin e Qendrave të Votimit rrezikon të paracaktojë maxhorancën në vendimmarrje. Në draftin e Partisë Socialiste për ndryshimet në Kodin Zgjedhor, propozohet që sekretari të zgjidhet nga radhët e mësuesve që japin mësim në shkollat publike në zonën që mbulon qendra e votimit. Sipas propozimit, në nenin 36 të Kodit Zgjedhor, kërkohet që Drejtoria Arsimore Rajonale të hartojë listën e mësuesve që ndodhen në zonën që mbulon qendra e votimit.
Kjo rrezikon që Drejtoria Arsimore të përfshijë në listën e saj ata mësues që kanë preferenca partiake të shumicës në pushtet, nga e cila drejtori i Arsimit Rajonal është emëruar. Në këtë mënyrë, me këtë preferencë partiake, shumica e Komisionit të Qendrës së Votimit do të ishte e garantuar për koalicionin në pushtet, pasi mësuesi i zonës, i cili kontrollohet vazhdimisht në punën e tij nga Drejtoria Arsimore Rajonale, do të garantojë shumicën në vendimmarrjen e Komisionit të Qendrës së Votimit.
“KZAZ zgjedh me short sekretarin e KQV-së nga listat e mësuesve, të cilët ushtrojnë detyrën në një nga institucionet publike brenda territorit që mbulon ZAZ-ja. Të gjitha DAR dërgojnë të paktën 45 ditë para ditës së zgjedhjeve listën e mësuesve të ndarë për çdo zonë që ato mbulojnë pranë KZAZsë përkatëse. Në rast se një DAR mbulon më shumë se një ZAZ, ajo bën ndarjen e listave në bazë të institucioneve të arsimit publik, të cilat ndodhen brenda territorit të ZAZ-së”, thuhet në nenin 36 të Kodit Zgjedhor të propozuar nga Partia Socialiste.
Kreu i Komisionit të Posaçëm për Reformën Zgjedhore, Taulant Balla, ka shprehur vazhdimisht nevojën për depolitizimin e administratës zgjedhore dhe me këtë propozim, Partia Socialiste po bën hapin e parë për të përfshirë mësuesit në pozicionin e sekretarit të KQV, si anëtar i shtatë i këtij komisioni.
Edhe pse në draftin e PSsë parashikohen masa mbrojtëse për mësuesit ndaj ndëshkimeve administrative që mund t’i vijnë nga Drejtoria Arsimore, është e vështirë të parashikohet se sa i pavarur nga pushteti do të jetë mësuesi në vendimmarrjen e tij.
“Të gjithë mësuesit, të cilët emërohen nga KZAZ në qendrën e votimit, janë të detyruar të marrin trajnimin e detyrueshëm bazë të organizuar nga KQZ dhe të marrin pjesë në procesin zgjedhor. Ndaj tyre nuk mund të fillojë procedura për masa disiplinore apo lëvizje gjatë gjithë periudhës në të cilën janë emëruar deri në 9 muaj pas përfundimit të zgjedhjeve. Në rast se para fillimit të detyrës ndaj tyre ka filluar procedura për marrjen e masës disiplinore, ajo pushohet për 6 muaj nga emërimi”, thuhet në propozimin e Partisë Socialiste për Kodin e ri Zgjedhor.
Por pasi përzgjidhet në postin e sekretarit të KQVsë, mësuesi është i detyruar të paraqitet në këtë funksion, në të kundërt, ai rrezikon të humbë vendin e punës.
“Në rastet kur sekretari i KQV-së nuk paraqitet në detyrë, ai zëvendësohet nga KZAZ-ja me një nga mësuesit e listës në dispozicion, mosparaqitja në detyrë pa shkaqe të arsyeshme përbën shkak për fillimin e procedimit disiplinor për largim nga detyra”, thuhet në propozimin e PS-së.
PROPOZIMET E PS-SË
Sekretari i KZAZ-së zgjidhet me short nga KQZ ndërmjet noterëve publikë të licencuar, që ushtrojnë aktivitetin në njësinë vendore ku ushtron juridiksionin KZAZ.
KZAZ zgjedh me short sekretarin e KQV-së nga listat e mësuesve, të cilët ushtrojnë detyrën në një nga institucionet publike brenda territorit që mbulon ZAZ-ja.
Rezultatet e sondazheve zgjedhore, nuk mund të publikohen gjatë 5 ditëve të fundit para datës së zgjedhjeve, përfshirë dhe datën e zgjedhjeve deri në orën e mbylljes së votimit.
Ndalohet përdorimi i portaleve elektronike të pakontrolluara nga Bordi i Monitorimit të Mediave për propagandë zgjedhore.
Autoritetet shtetërore marrin masa për mbylljen gjatë fushatës zgjedhore të portaleve elektronike të paregjistruara, të cilat përhapin propagandë zgjedhore, zhvillojnë sondazhe pa respektuar rregullat e këtij kodi, apo kalojnë kufirin e informimit dhe konsiderohen propagandë zgjedhore. ‘Panorama’
