Lionel Messi ka një kontratë të përjetshme me Barcelonën, por varet nga lojtari nëse dëshiron të qëndrojë te klubi – është shprehur presidenti Josep Maria Bartomeu.
Kontrata aktuale e argjentinasit është valide deri në qershor të vitit 2018 dhe pritet që të nisin bisedimet për rinovimin e saj.
Mirëpo, kreu i klubit e ka bërë të qartë se Blaugranët e duan 29-vjeçarin gjithmonë në skuadër dhe ai duhet të vendosë se çfarë do të bëjë në të ardhmen.
“Ai i ka të gjitha vitet që dëshiron (me Barcën). Lionel Messi është lojtari më i mirë që ka luajtur futboll ndonjëherë në historinë e botës dhe ai luan me ne”.
“Në muajt e ardhshëm padyshim se do të flasim me të, por ai tashmë e di se ka kontratë përgjithmonë. Nuk ka kufi me të”.
“Kufiri do të vendoset nga ai dhe tash është 29 vjeç, është i talentuar, ambicioz dhe është në formë të përsosur për të vazhduar për shumë vite”, ka theksuar Bartomeu për ESPN. /a.m.
