Një meshë për Nënë Terezën është organizuar në Vatikan nën patronazhin e presidentit të Kosovës, Hashim Thaçi, ka bërë të ditur Departamenti i Informacionit dhe Komunikimit me Publikun në Zyrën e Presidentit të Kosovës.
Sipas njoftimit zyrtar, në këtë meshë përveç Thaçit kanë marrë pjesë edhe përfaqësues të korit diplomatik në Romë, përfshirë përfaqësuesit diplomatikë të Malit të Zi dhe Shqipërisë, shkruan Koha Ditore.
“Mesha e kremtuar në Kishën e Shën Gregorit u udhëhoq nga kardinali Angelo Comastri, kryeprift i Bazilikës së Shën Pjetrit në Vatikan, i cili është edhe njëri prej deponuesve të mrekullisë së Nënës Terezë, që mundëson shenjtërimin e saj”, thuhet në komunikatën për media, ku shtohet se shenjtërimi i Nënës Terezë, sipas Thaçit, “është mesazhi më i mirë që Vatikani bën për një personalitet që dashurinë dhe shpirtin e saj solidar ia ka dhuruar njerëzimit”.
“Ai shpirt solidar, ai mirëkuptim i saj, ato mesazhe të dashurisë, të kujdesit ndaj të gjithëve, ndaj njerëzve me nevojë kudo në botë, tregojnë edhe shpirtin e origjinës së saj, që ka qenë i mishëruar me vlerën e saj humane, njerëzore, që i ka dërguar gjithë botës. Shenjtërimi nuk është vetëm nder për kombin shqiptar, por është nderim edhe për vlerat universale që Nënë Tereza i ka përçuar anekënd botës”, ka thënë Thaçi për shenjtërimin e Nënës Terezë. (b.an)
