Për të përshëndetur Panairin e Librit dhe uruar suksese autorëve pjesëmarrës në këtë panair, Ambasadorja e SHBA në Tiranë publikoi në rrjetet sociale një foto, ku shfaqet duke lexuar “Për kë bie kambana” të Ernest Heminguej.
“Më ka pëlqyer gjithmonë ajo që ka thënë C.S. Lewis, që ne lexojmë për ta ditur se nuk jemi vetëm”, shkruan Ambasadorja në foton në fjalë.
Përzgjedhja e librit, autorit dhe titullit për këtë foto mund të jetë rastësi, por mund edhe të mos jetë, që do të thotë se pas këtij imazhi fshihet një mesazh i koduar, por për kë?
Lulzim Basha dhe Sali Berisha janë përfshirë në akuza e kundërakuza se kush “e do më shumë Amerikën” dhe kush jo. Jashtë përplasjes së tyre nuk ka mbetur as vetë Ambasadorja e SHBA, e cila që pas paralajmërimit se SHBA “do të ndërpriste komunikimin me një parti që drejtohet nga një person non grata” duket se ka shpërfillur përplasjen e brendshme në PD.
Po për kë bie kambana? Një prej veprave të vlerësuara nga kritika ndër më të mirat të Ernest Heminguejt ndoshta mund të na vijë në ndihmë. Novela e publikuar në vitin 1940 tregon historinë e Robert Jordan, një vullnetari amerikan që bëhet pjesë e luftës civile spanjolle në krah të forcave republikane.
Megjithatë, novela nuk e përcjell mesazhin e saj kryesor vetëm përmes një karakteri. Shumë prej karaktereve të saj shohin t’u trazohen besimet morale nga lufta ku janë përfshirë dhe fitorja në këtë luftë kërkon përdorimin e dhunës për të mposhtur armikun dhe me këtë të gjithë bien dakord. Por, megjithëse dhuna shihet si e nevojshme, sërish ajo nuk i bind nëse është rruga e drejtë. Kjo është dilema e karaktereve të Heminguejt.
Titulli “Për kë bie kambana” u referohet kambanave që lajmërojnë, jo vetëm një vdekje, por edhe një fund. Prandaj, për kë po bie kambana në Tiranë? TEMA
