Ambasadori i SHBA-ve Donald Lu i është drejtuar magjistratëve të rinj të vendit me një mesazh të qartë.
“Tregoni se mund të bëni drejtësi pa para, pa ndikim politik dhe frikë nga kriminelët e rrezikshëm”.
Kjo ishte dhe këshilla e përfaqësuesit të SHBA-ve në Tiranë, i cili mori pjesë në ceremoninë e diplomimit të magjistratëve të rinj të vendit.
Ambasadori Lu në fjalën e tij është shprehur gjithashtu se brezi i ri i gjyqtarëve dhe prokurorëve duhet të lërë gjurmë në vend, duke deklaruar gjithashtu se koha e të inriminuarve dhe të korruptuarve në sistem ka përfunduar. Lu ka folur gjithashtu edhe për një pendim të tijin, që e bën të ndihet fajtor.
“Koha e gjykatësve dhe prokurorëve të korruptuar ka përfunduar, sot, është dita juaj. Është momenti që gjykatësit dhe prokurorët e rinj të lënë gjurmë. Shqiptarët duhet të mbushen me shpresë se brezi juaj do të rikthejë shpresën dhe besimin se do të ketë drejtësi për të gjithë.
Kam qenë fajtor për shumë gjëra në jetën time, por këto 2 vitet e fundit kam qenë fajtor për kritikat për integritetin dhe profesionalizimin e gjykatësve dhe prokurorëve në Shqipëri.
Duhet t’i tregoni botës se mund të bëni më shumë. Pa para korruptimi, pa ndikim nga politika dhe pa u frikësuar nga kriminelë të rrezikshëm. Duhet të përballeni me sfidën për t’u bërë brezi që ndërton besimin e njerëzve, t’u tregoni atyre që mund të bëni më shumë, më mirë, t’u tregoni atyre që jeni profesionistë të drejtë dhe të mençur. Keni për të ngjitur një mal të madh, por me kurajë të madhe e vendosmëri të gjithë ne kemi besim se do t’ia dilni. Ta kujtojmë këtë ditë si ditën e parë të brezit të ri të profesionistëve të drejtësisë në Shqipëri”, u shpreh ambasadori Lu.
Të pranishëm në ceremoni ishin Lu, Kryeprokuri Adriatik Llala dhe Kreu i Gjykatës së Lartë Xhezair Zaganjori./java/a.k
