Mesazhi i “koduar”/ I dërguari gjerman për Ballkanin shmang Bashën e Berishën, takon Alibeajn e Pollon: Pozitive që kontakton opozitën

I dërguari i Gjermanisë për Ballkanin Perëndimor, Manuel Sarrazin, në vizitën e tij të parë zyrtare në Tiranë, takoi kryeministrin Edi Rama, por shmangu kreun e PD, Lulzim Basha. Në një kohë që nga PD-ja zyrtare takoi nënkryetarin e saj, Enkelejd Alibeaj, Sarrazi ka pasur një takim edhe me përfaqësuesin e grupimit të Sali Berishës, Genc Pollon.

Në përfundim, ky i fundit foli si përfaqesues i PD-së duke e cilësuar si diçka pozitive faktin që Sarrazi ka takuar opozitën, e ndërsa u ndal edhe në pikat e tjera në të cilën u përqëndrua biseda me zyrtarin gjerman.

” Me z. Manuel Sarrazin takohem sërish në Tiranë. Dikur si raporter për Shqipërinë grupit i Partisë së Gjelbër në Bundestag, sot i Dërguar i Posaçëm i qeverisë gjermane për Shqipërinë e Ballkanin Perëndimor. Është pozitive që ai kontakton edhe opozitën.

Përveçse dënimit të agresionin të Putinit kundër Ukrainës dhe rolit të Shqipërisë ku gjërat janë të qarta u ndala tek procesi i integrimit në Bashkimin Europian. Fuqitë e treta jo miqësore me BE nuk kanë përkrahje në popullsinë shqiptare. Partia Demokratike siç ka realizuar në të shkuarën ashtu do të konsolidojë edhe në të ardhmen ankorimin e vendit në Europë e në Perëndim.

Partia Demokratike do të mirëpriste  çeljen e negociatave për anëtarësim këtë gjashtëmujor nën presidencën franceze të BE-së. Por vlera konkrete e këtyre negociatave për shtetin tonë e ndonjë tjetër në rajon ku dominon korruptokratia është në radhë të parë rekuperimi i elementeve bazë të shtetit ligjor e të demokracisë; ose siç njihen Kriteret e Kopenhagenit të cilat janë kusht sine qua non për BE.

Neglizhimi i tyre nuk është ndihmë për popullin shqiptar. Gjermania me rolin e saj pozitiv në rajonin tonë dhe në BE mund të ndikojë veçanërisht në këtë drejtim”, tha Pollo./m.j