Ambasadori i Shteteve të Bashkuara të Amerikës Donald Lu ka bërë akuza të forta për sistemin e drejtësisë dhe për krimin e organizuar në vend.
Në këtë aspekt, ambasadori amerikan ka deklaruar hapur se janë “katër klane kryesore drejtojne 20 familje të cilat dominojnë aktivitetet kriminale”.
Donald Lu ka përmendut me emra disa prej tyre.
“Emiljano Shullazi thuhet se vijon të bëjë trafik droge nga qelia. Lul Berisha u lirua gabimisht më herët nga zyrtarët e burgut. Megjithëse u procedua drejtori dhe juristi i burgut, Lul Berisha është i lirë.
Klemend Balili ia ka dalë prej 18 muajsh t’i shpëtojë drejtësisë”, tha ambasadori i Shteteve të Bashkuara.
Ndër të tjera, diplomati amerikan përshëndeti faktin se parlamenti i legjislaturës së re është më i mirë se i kaluari.
“Parlamenti i 2017-ës është më i mirë se i kaluari. Shqiptarët ia dolën të nxjerrin kriminelët nga Parlamenti”.
Lu kritikoi fort sistemin e drejtësisë, duke përmendur faktin se nuk është arrestuar asnjë “kokë e madhe” dhe vrasjen e gjyqtares Fildes Hafizi.
“Ka shumë Shullazë, Lulzim Berisha dhe Klement Balilë në Shqipëri. Këta meritojnë burg. Zero arrestime për peshqit e mëdhenj. Sistemi i drejtësisë e la në baltë Fildes Hafizin”.
Vlahutin: Sistemi po çalon te viktimat e dhunës në familje
Nga ana e saj, ambasadorja e BE në Tiranë, Romana Vlahutin, tha se do të mbështesë çdo institucion që do të luftojë korrupsionin. Vlahutin deklaroi se Shqipëria është në prag të një sistemi të ri gjyqësor dhe në muajt në vijim do të bëhet dhe Vettingu.
Më tej, diplomatja theksoi se institucionet e reja dhe SPAK do duhet të gjurmojnë shumë paligjshmëri, duke shtuar se sistemi po çalon te viktimat e dhunës, duke risjellë dhe njëherë në vëmendje rastin e gjyqtares Fildeze Hafizi, që u vra mizorisht nga ish-bashkëshorti.
“Ne si BE do bëjmë çmos për të përkrahur atë që shqiptarët presin, do mbështesim çdo institucion, që do luftojë korrupsionin. Dy dekadat e një epoke të edukimit juridik, kjo nuk ka qenë një punë e lehtë. Shqipëria është në prag të një sistemi të ri gjyqësor. Në muajt në vazhdim do të bëhet Vettingu. Kjo është shumë e rëndësishme për njerëzit e Shqipërisë, por edhe jashtë. Institucionet e reja dhe SPAK do duhet të gjurmojnë shumë paligjshmëri. Do luftojmë korrupsionin dhe godasim paligjshmëritë. Sistemi po çalon te viktimat e dhunës në familje si gjyqtarja Fildeze Hafizi. Magjistratët janë e ardhmja e këtij kombi”, u shpreh Vlahutin.
a.ç
