Kryetari i Partisë Demkratike Lulzim Basha mbajti një fjalim në çadrën e protestës para kryeministrisë ku u mblodhën edhe përfaqësuese të Forumit të Gruas Demokrate.
Ai deklaroi se në atë protestë nuk do t’i luten askujt, duke theksuar se do vijë koha kur të tjerët do vijnë të luten.
“Ne nuk jemi këtu për t’ju lutur askujt, koha kalon, koha po vjen kur do vijnë të luten ata. Më mirë të vijnë ata pasi nuk do shpëtojnë nga zgjedhja e popullit. Zgjedhje të lira pa qeverinë që i hapi rrugë dhunuesve të grave, trafikantëve. Largim të këtij kabineti të bërë njësh me krimin ose zgjedhje nuk do të ketë”, deklaroi Basha.
Edhe pse nuk dihet se kujt i drejtohej kjo deklaratë, prej ditësh nuk kanë munguar as ftesat konkrete nga opozita për Ilir Metën, teksa një ditë më parë ai drekoi me kreun e PAA Agron Duka. Po ashtu edhe Vangjel Dule i ka bërë thirrje LSI-së të braktisë koalicionin qeveritar. Deklarata disi më të kujdesshme janë bërë edhe nga eksponentë të tjerë demokratë në adresë të LSI-së.
Ndërkohë Basha mes të tjerash deklaroi para grave demokrate se nëpërmjet zgjedhjeve të lira, dmeokratët do kthejnë pushtetin te populli dhe do realizojnë reforma të rëndësishme.
“Kjo merr fund kur ne me votë të lirë marrim të drejtën për të shkarkuar dhe emëruar të zgjedhurit tanë në emër të punës që bëjnë. Ne vijmë me ofertën e taskave të ulta, ofertën me stimuj fiskalë për ata që mbështesin gratë. Ofertën për një Shqipëri që të rinjtë të mos ende rrugëve. Të rinjtë pas mësimit të ndjekin lëndë shtesë nëpër shkolla sa nënat të kthehen nga puna. Shkolla që kujdesen për fëmijët deri në orën 4, deri në orën 4.30. Si arrihen këtom vetëm me votën e lirë, vetëm me zgjedhje të lira e të ndershme”, deklaroi Basha.
