Pas mesazheve kërcënuese të ekstremistëve sllavë të Maqedonisë në adresë të deputetes së PDIU-së, Mesila Doda e cila foli kohë më parë për “Iliridën”, vijnë edhe mesazhet e solidaritetit nga deputetë, analistë, gazetarë e personalitete të tjera për të.
Në krah të saj kanë dalë edhe ministrja e Mbrojtjes Mimi Kodheli si dhe deputetja e PD-së, Majlinda Bregu.
“Kush urren nuk e njeh Zotin. Mesila, ti je nga ato që jo vetëm e njeh Atë por e mban pranë. Këta që shkruajnë janë larg… shumë larg Tij”, shkruan Mimi Kodheli.
“Çfare s te vret, te ben me te forte, apo jo? Sa kohe kemi qe po e provojme kete?” shkruan deputetja Bregu.
“Familja Doda ndër vite ka nxjerrë patriotë”, shkruan një komentues, ndërsa Ilir Hoxholli shpreh bindjen se deputetja nuk është trembur, por kërkon të sensibilizojë për urrejtjen që sllavo-maqedonasit kanë për shqiptarët:
“Ngjarjet e fundit më bënë të kuptoj se nacionalistët maqedonas edhe po të rrish urtë nuk do reshtin t’i shkelin të drejtat e shqiptarve.
Unë e di që nuk je e trembur, por thjesht doje të ndaje me ne kush janë ekstremistët maqedonas…”
Mesila Doda: Kam marrë kërcënime në gjuhën maqedonase
Deputetja e Partisë Drejtësi, Integrim dhe Unitet Mesila Doda ka shkruar një status në rrjetin social “Facebook”, ku thotë se ka marrë mesazhe kërcënuese pas deklaratave të lëshuara për shqiptarët e Maqedonisë, ku ajo ka përmendur edhe termin politik “Ilirida”.
Pak kohë më parë Doda ishte shprehur: “Do të them dy fjalë për një krahinë që më rrihte fort në zemër, është vendi karshi, Ilirida, krahina e moçme shqiptare, që edhe emrin sot ia kemi harruar.
Dikush i thotë Maqedoni e dikush FYROM e ne ripërsëritim ILIRIDA”, kishte thënë ajo.
ma.me
