Meryl Streep, e cila gjatë karrierës së saj 40-vjeçare në aktrim asnjëherë nuk ka shërbyer si anëtare e jurisë së ndonjë festivali, sivjet do të vijë në rolin e kryetares së jurisë së edicionit të 66-të të festivalit ndërkombëtar të filmit në Berlin .I pyetur si ka arritur ta bindë aktoren Hollyëood-iane të rikthehet në Berlinale, drejtori i festivalit, Dieter Kosslick, duke bërë shaka tha: “I dhurova asaj një buqetë me lule, të blerë në një pompë të benzinës, për një çmim tejet të përshtatshëm”. Në vitin 2003 Streep e ndau çmimin “Ariu i Argjendtë” me aktoret Julianne Moore dhe Nicole Kidman, pasi ishin nderuar për performancën e tyre në filmin “The Hours”.
Ndërsa në vitin 2012 ajo e pranoi një çmim special për arritjet e saj në karrierë dhe organizatorët e Berlinales e shfaqën një kolazh të filmave të saj, të realizuara ndër vite, transmeton emisioni Express i KTV-së. Edicioni i sivjetmë i festivalit të filmit në Berlin, që është një prej ngjarjeve më të rëndësishme kinematografike në Evropë, do të presë yje të njohur të Hollywood-it si: George Clooney, Josh Brolin, Tilda Swinton, Channing Tatum, vëllezërit Coen, Colin Firth, Jude Laë, Laura Linney, Emma Thompson, Daniel Bruehl, Isabelle Huppert dhe Gerard Depardieu.
Ndërkaq në mesin e filmave të shumtë që do të shfaqen sivjet në këtë festival, qoftë jashtë konkurrencës, apo në garë për çmimin “Ariu i Artë” është edhe filmi i shumë shpërblyer kosovar “Babai”, me regji të Visar Morinës. Filmi do të shfaqet në kuadër të programit “Lola” të Berlinales, më saktësisht do të ekranizohet më 12 shkurt, në kinemanë “Zoo Palast”.
