SPAK ka përfunduar hetimet dhe ka dërguar për gjykim çështjen penale ndaj avokatit Bardhi Koçit dhe shtetases Pranvera Meshit, të akuzuar për ushtrim ndikimi të paligjshëm ndaj personave që ushtrojnë funksione publike.
Sipas SPAK, avokati Bardhi Koçi ka kërkuar dhe marrë shuma parash në të paktën 5 raste, në këmbim të premtimeve për ndikim në vendimmarrjen e gjyqtarëve apo ekspertëve.
Në një rast, ai ka marrë 1,000 euro nga Pranvera Meshi për të ndikuar tek gjyqtari që po shqyrtonte çështjen ndaj saj ku akuzohej për veprën penale “Falsifikim i dokumenteve shëndetësore”. Po ashtu, ka kërkuar 1,300 euro nga një tjetër person, A.M., për të ndërhyrë tek funksionarë të drejtësisë me qëllim përshpejtimin e një seance gjyqësore.
SPAK thotë se Koçi ka përfituar edhe nga një tjetër shtetas, R.G., për të ndikuar tek ekspertët e Institutit të Policisë Shkencore në nxjerrjen e një akt-ekspertimi kimik lidhur me një sasi lënde narkotike. Hetuesit kanë dokumentuar edhe dy episode të tjera të ngjashme dhe po vijojnë verifikimet për rrethana të tjera.
