Në një fitore tejet simbolike, disa grupe rebele të mbështetur nga Turqia i morën Shtetit Islamik kontrollin e Dabiq, qyteti në veri të Sirisë i cili sipas disa profecive islamike do të ishte vendi i betejës së fundit mes Islamit dhe Krishtërimit.
Rebelët, të mbështetur nga tanke dhe avionë luftarakë turq, morën Dabiq dhe qytetin fqinj të Soranit pas përleshjeve të së dielës siç deklaroi për Reuters Ahmed Osman, kreu i grupit Murad, një prej fraksioneve të Ushtrisë së Lirë Siriane i përfshirë në luftime.
“Miti i ISIS mbi betejën e madhe në Dabiq ka marrë fund”, tha Osman.
Ibrahim Kalin, zëdhënësi i presidenti turk Recep Tayyip Erdogan , e cilësoi çlirimin e Dabiq si “një fitore strategjike dhe simbolike” kundër ISIS dhe informoi se forcat e mbështetura nga Ankaraja do të vazhdojnë drejt juglindjes në qytetin e Al Bab.
Sipas profecive të disa teksteve të shenjta islamike fundi i botës-dhe parajsa e mëpasshme do të parapriheshin nga “beteja finale” midis forcave të kalifatit dhe Romës në qytetin e Dabiq, ku, pavarësisht se “të pafetë” do të kishin numër të madh forcash do të fitonin myslimanët. Terroristët e Shtetit Islamik morën kontrollin e Dabiq në gusht 2014. Disa ekspertë vlerësojnë se humbja Dabiq do të nënkuptonte fundin e ISIS, sepse “ata do të humbasin kuptimin e vërtetë të ekzistencës së tyre”.
ma.me
