Kreu dhe punonjësi i Zyrës Postare në Maqellarë të Dibrës është shpallur në kërkim nga policia pas kallëzimit të bërë një ditë më parë.
Policia lokale njofton se po punohet për arrestimin e shtetasit Skerdinand Hoxha, 28 vjeç, lindur në Peshkopi dhe banues në Maqellarë.
“Shtetasi i mësipërm duke shfrytëzuar detyrën si ‘kryetar e punonjës Shërbimi i Zyrës Postare Maqellarë, Dega e Postës sh.a Dibër, ka tërhequr nga arka e Degës së Postës sh.a Dibër për kryerjen e shërbimeve një sasi prej 7.356.092 lekë të reja dhe është larguar duke marrë me vete dhe shumën në fjalë. Vendndodhja e tij aktuale nuk dihet. Po punohet për kapjen dhe ndalimin e tij”, sqaron policia.
Rasti u denoncua pasditen e djeshme nga Kryetarja e Degës Posta sh.a Dibër shtetasja S. Ç. Materialet procedurale i kaluan Prokurorisë pranë Gjykatës së Shkallës së Parë Dibër për veprën penale “Vjedhja e kryer duke shpërdoruar detyrën”.
