Kancelarja Angela Merkel i bëri sot thirrje Ankarasë për të ruajtur gjakftohtësinë në krizën e tanishme diplomatike gjermano-turke, duke reaguar ndaj deklarateve të presidentit Erdogan që e akuzoi Gjermaninë për praktika naziste.
“Në adresë të partnerit tonë turk, tregohuni kritik atje ku është e nevojshme por mos lini në harresë rëndësinë e partneritetit tonë, të marrëdhënieve tona të ngushta. Dhe ruani gjakftohtësinë”, njoftoi për median zëdhënësi i kancelares, Steffen Seibert.
“Ne kundërshtojmë asimilimin e politikës së Gjermanisë demokratike me atë të nacional-socializmit. Në mënyrë të përgjithshme krahasimet me nazismin janë mjaft absurde dhe të pavend”, pohoi ai.
Një ditë më parë, presidenti turk, Recep Tayyip Erdogan akuzoi Gjermaninë se po përdor praktika naziste pas ndalimit në fund të javës së kaluar nga ana e autoriteteve lokale gjermane të tubimeve elektorale në favor të “po” në referendumin e 16 prillit në lidhje me zgjerimin e kompetencave të presidentit në Turqi./b.d
