Futbollisti shqiptar, Mergim Vojvoda përmes një postimi në Facebook ka konfirmuar vendimin e tij që në të ardhmen të luajë për Përfaqësuesen e Kosovës në futboll.
21 vjeçari, i cili luan në ligën elitare në Belgjikë për Royal Excel Mouscron deri më tani ka luajtur për Kombëtaren e Shqipërisë U-21, transmeton Koha.net.
“Dua të informoj opinionin për vendimin që kam marr, për të luajtur në të ardhmen për Përfaqësuesen e Kosovës. Kam luajtur për ekipin U-21 të Shqipërisë dhe tash e tutje do të jem në dispozicion të FFK-së, nëse vendos të më thërret”, ka shkruar Vojvoda.
Ai më tutje ka treguar edhe arsyen për këtë vendim të tij.
“Ky vendim imi është një zgjedhje logjike për Kosovën, pasi që aty kanë lindur prindërit e mi, aty është shtëpia jonë. Thjesht, unë Kosovës nuk mund t’i them jo. Nëse Kosova më thërret unë jam gati të jap kontributin tim maksimalisht. Po ashtu jam i bindur se çdo njeri në pozitën time, në rrethanat e mia dhe në këtë kohë do të merrte të njëjtin vendim. Ju falënderoj të gjithë tifozëve shqiptar për mbështetjen”, ka shkruar ai. (b.an)
