Modeli i radhës i kompanisë Mercedes, i cili premierën do ta mbajë në panairin e veturave në Detroit, është Mercedes AMG S63 4MATIC Cabrio 130 Edition. Ky model i veçantë është ndërtuar me rastin e 130-vjetorit të shpikjes së automobilave (në vitin 1886). Me këtë rast, ky model do të prodhohet në një seri të limituar në vetëm 130 njësi. Mercedes i ri karakterizohet me pjesën e jashtme me ngjyrë të argjendtë Alubeam, rrotat dhjetëcepësh prej alumini me ngjyrë të zezë mat dhe me diametër prej 20 inç, si dhe me disqet e frenave me ngjyrë të kuqe.
Sa i përket pjesës së brendshme, ky model i veçantë vishet prej lëkure Nappa me ngjyrë Bengal kuqezi apo gri-zezë, si dhe me disa elemente me ngjyrë të zezë. Ky model ka sistemin e tërheqjes në të gjitha rrotat, dhe shpejtësinë prej 0 deri në 100 kilometra në orë e arrin për vetëm 3,9 sekonda. Shitja e këtij modeli të veçantë zyrtarisht do të fillojë në muajin prill, ndërsa çmimi i tij në Gjermani do të jetë 226.457 euro.
