Modeli i radhës i kompanisë Mercedes, i cili premierën do ta mbajë në panairin e veturave në Detroit, është Mercedes-AMG S63 4MATIC Cabrio 130 Edition. Ky model i veçantë është ndërtuar me rastin e 130 vjetorit të shpikjes së automobilave (në vitin 1886), transmeton Koha.net. Me këtë rast, ky model do të prodhohet në një seri të limituar në vetëm 130 njësi.
Mercedes-AMG S63 4MATIC Cabrio 130 Edition karakterizohet me eksterier me ngjyrë të argjendtë Alubeam, çatinë Bordeaux me ngjyrë të kuqe, rrotat dhjetëcepësh prej alumini me ngjyrë të zezë mat dhe me diametër prej 20-inç, si dhe me disqet e frenave me ngjyrë të kuqe.
Sa i përket interierit, ky model i veçantë posedon interier prej lëkure Nappa me ngjyrë Bengal kuqezi apo gri-zezë, si dhe me disa elemente me ngjyrë të zezë. Po ashtu posedon edhe tapicerinë me ngjyrë të njëjtë sikurse interieri, etiketën e veçantë në konzolën qendrore dhe në timon. Ndërkaq sa i përket motorit, ky AMG S63 4MATIC Cabrio 130 Edition posedon motorin 5.5-litër V8 Bi-Turbo me kapacitet prej 585 kuajfuqi, në kombinim me marshin automatik me nëntë shpejtësi. Po ashtu posedon sistemin e tërheqjes në të gjitha rrotat, dhe shpejtësinë prej 0 deri në 100 kilometra në orë e arrin për vetëm 3,9 sekonda. Shitja e këtij modeli të veçantë zyrtarisht do të fillojë në muajin prill, ndërsa çmimi i tij në Gjermani do të jetë 226.457 euro.
