Gazetari Mentor Kikia ka ngritur disa pikëpyetje mbi protestën disaditore të banorëve të Unazës së Re. Sipas tij policia po lejon qëllimisht konfrontimin mes banorëve, kalimtarëve me automjete dhe mediave:
Policia e Shtetit është përfshirë në një lojë djallëzore dhe tinëzare në protestën e banorëve të Unazës së Re në Tiranë. Ndërsa bllokohet arteria më e ngarkuar e trafikut rrugor, prej 8 ditësh me radhë, në mëngjes dhe pasdite, policia nuk ka ndërhyrë në asnjë rast të vetëm, duke lënë gjithëçka në mënyrë spontane. Edhe pse bllokimi i rrugës është vepër penale. Në dukje të parë, kjo ngjan një veprim për të mos ndërhyrë në të drejtën e protestës së qytetarëve, por në fakt ai është një veprim i qëllimshëm, një kurth, për ta çuar situatën në konfrontim mes qytetarëve. Sot paradite, përplasja mund të kishte shkuar edhe më keq. Policia, jo vetëm që nuk ka ndaluar protestuesit të bllokojnë rrugën, por nuk ndaloi as automjetet ti drejtohen vendit të bllokimit, duke çuar në konfrontim mes protestuesve dhe drejtuesve të mjeteve që duan të kalojnë. Nuk munguan konfrontimet e dhunshme mes tyre, duke mos kursyer as dhunën ndaj kameramanëve të televizioneve. Në tërë këtë situatë ekspolozive, nuk kishte asnjë këmbë polici.
Sepse pikërisht ky është qëllimi i policisë, konfrontimi mes qytetarëve dhe shveshja e protestës nga mbështetja qytetare. Dhe strategjia funksionon për mrekulli, kur dhjetra mijëra banorë çdo ditë duhet të përjetojnë makthin e bllokimit të trafikut si pasojë e kësaj proteste.
E kush mund ta përkrahë tashmë këtë protestë? Edhe pse kauza e tyre eshtë e drejtë. Në kurthin e policisë ka rënë këmbë e kokë edhe opozita, e cila në vend që ti ftojë qytetarët të protestojë, p.sh, para selisë së qeverisë, i ftoi të protestojnë pikërisht duke bllokuar rrugën.
Rrugët nuk janë të qeverisë zoti Basha. Në atë rrugë do të kalojnë edhe qytetarët, edhe zjarrfikëset, edhe autoambulancat, edhe policia(nëse do të ishte në detyrë, kuptohet).
Si pasojë e kësaj dhune, sot një kameraman i Klan Plus u plagos, dhe një kamera u thye.
