Kryetari i Partisë Demokratike Shqiptare Menduh Thaçi i pyetur se pse nuk ka vizituar vendet e prekura nga vërshimet e 6 gushtit, tha se nuk është i interesuar për pikë politike. Ai madje tha se nuk ka fuqi që të vizitojë e t’u ndihmojë këtyre vendeve pasi që është opozitë.
Thaçi theksoi se qeveria nuk mund të luftojë fenomenet natyrore, por megjithatë mund të rregullojë kanalizimet atmosferike me qëllim që të zvogëlojnë rrezikun nga vërshimet.
“Si gjithmonë, unë e mbaj atë qëndrim, ndoshta ndokujt nuk i pëlqen, i kërkoj ndjesë por nuk dua të jem pjesë e marketingjeve bajate në kurriz të fatkeqësive të njerëzve. E dyta, aq e kam takatin, jam opozitë, nuk mund vetëm të shkoj t’i përkëdhelim njerëzit.
E treta mendoj se betejën e tretë institucionale si parti politike jemi duke e bërë. Ne nuk kërkojmë nga këta shqiptarë që janë në qeverisje të bëjnë luftë me zotin dhe t’i parandalojnë fenomenet natyrore, megjithatë çështja e kanalizimit atmosferik është një çështje shumë e prekshme”, deklaroi Menduh Thaçi, kryetar i PDSH-së, referuar Express. (b.an)
