Një ngjarje e rëndë ndodhi ditën e djeshme në Tiranë, ku një I moshuar ndërroi jetë në një azil privat.
Ngjarja ndodhi në azilin privat “Ruaje Moshën”, në afërsi të Ali Demit në kryeqytet.
Si ndodhi vrasja:
78-vjeçari Zyhdi Shehu vrau me bastun shokun e tij 82-vjeçarin Virxhil Vesho në azilin privat të sipërpërmendur.
Autori vuan nga skleroza dhe sëmundje të tjera. Shkak i sulmit ka qenë një konflikt banal mes dy të moshuarve për krevatin.
Ngjarja nuk raportohet:
Fillimisht ngjarja nuk raportua në polici, pasi infermierja kishte njoftuar morgun dhe një agjensi funerale për të tërhequr trupin e viktimës.
“Menduam se ishte rrëzuar dhe kishte vdekur kur e gjetëm”, kanë thënë dy infermierët në polici.
Megjithatë pretendimet e infermiereve Nazime Mulla dhe Glesantina Saraçi nuk i ka bindur hetuesit e Policisë të cilët i arrestuan ato me akuzën “kryerja e veprimeve që pengojnë të vërtetën”.
Grupi hetimor ka dyshime se infermierët nuk kanë kryer punën e tyre siç duhet dhe mbi faktin që nuk kanë marrë në telefon policinë për të denoncuar ngjarjen.
Agjencia funerale njofton policinë:
Infermieret njoftuan agjencinë e funeralit, të cilët kanë shkuar dhe kanë marrë trupin e mbështjellë me çarçaf. Ishte stafi i agjencisë të cilët pasi kanë parë trupin kanë vërejtur dëmtime në kokë. Më pas e kanë kthyer trupin në azil dhe kanë njoftuar policinë.
Efektivët kanë këqyrur kamerat e sigurisë dhe pasi morën në pyetje infermieret ato janë shprehur se fillimisht nuk kanë kuptuar se i moshuari të ishte vrarë, por kishin menduar se ngjarja ishte aksidentale.
/a.r
