Jennifer Aniston e dinte se seriali “Friends” ishte një lloj mrekullie për kastin dhe një fat kozmik, por për një kohë të gjatë nuk e kishte kuptuar ndikimin e vërtetë te fansat. Kjo zgjati deri në vitin 2021 kur të gjithë u ritakuan për herë të parë pas përfundimit të serialit ikonik, shkruan Vanity Fair. Aty, ata panë sesi fansat thoshin që kishin mësuar anglishten falë serialit apo kishin gjetur forcën në ditët e vështira.
Mjerisht, ai do të ishte takimi i fundit kur do të ishin të gjashtë protagonistët bashkë. Në vitin 2023, Matthew Perry u gjet i vdekur nga “efektet akute” të ketaminës ndërsa mbytja ishte faktor shtesë.
“Ne bëmë gjithçka mundëm kur mundëm”, thotë Aniston në intervistën e saj duke shtuar se po përpiqeshin ta ndihmonin gjatë luftës së tij me varësinë.
“Por thuajse ndihej sikur e vajtonim Matthew prej kohësh pasi beteja e tij me atë sëmundje ishte vërtet e vështirë që ai ta luftonte. Aq sa e vështirë ishte për të gjithë ne dhe fansat, një pjesë imja mendon se kjo është më mirë. Jam e lumtur që ai është larg dhimbjes”, u shpreh ajo.
Raporti i autopsisë zbuloi se Perry kishte marrë 27 doza ketamine në tri ditët para vdekjes. Katër persona kanë pranuar fajësinë dhe janë në pritje të dënimit. Muajin e ardhshëm nis gjyqi për “mbretëreshën e ketaminës” që akuzohet se i ka shitur aktorit të ndjerë dozën vdekjeprurëse.
