Ka qenë temë e diskutimit të mediave sportive shqiptare dhe italiane dje. Rey manaj, megjithatë, nuk është shpërqendruar, por ka gjetur forca të shënojë një gol me Shqipëria U-21, të japë maksimumin në barazimin 2-2 ndaj Hungarisë. Natyrisht, sikurse e ka pohuar edhe vetë në statusin e lënë dje në Facebook, është ndier shumë i bezdisur, i ofenduar nga deklarata e De Biazit, në emisionin televiziv “Procesi Sportiv”. Nuk ka duruar dot dhe i ka kthyer përgjigje trajnerit të kombëtares, duke e sfiduar që të publikojë “sms”-të që i paska dërguar pas çdo ndeshjeje.
Në fund, edhe një kujtesë për këdo: Trajnerët e huaj vijnë e shkojnë, lojtarët shqiptarë do t’i mbesin kombëtares sonë. Kjo “luftë frëngjish” ka shkaktuar një konfuzion në prapaskenë, qoftë te De Biazi, qoftë te familjarët e Manajt, qoftë te FSHF-ja. E para që ka reaguar ka qenë nëna e sulmuesit të Interit, duke kërkuar të fshihet ai postim, që nuk mund të jetë shkruar nga Manaj, pasi ai nuk di shqip (statusi ishte në dy gjuhë, shqip dhe italisht). Më vonë, për të qetësuar ujërat, sa mund të qetësohen pas një konflikti të ashpër verbal mes palëve, ka menduar menaxheri i Rey Manajt.
Ai ka pohuar në një intervistë telefonike për “Super Sport” se ka qenë pikërisht klienti i tij, Rey Manaj, që ka publikuar në Facebook një reagim ndaj De Biazit. Por, sipas tij, kanë qenë shokët e skuadrës, që ia kanë trasmetuar në mënyrë të gabuar lojtarit gjithçka dhe Manaj më pas është nxituar. Alberto Fontana është menaxheri i lojtarit shqiptar. Ai mendon se De Biazi është një njeri i drejtë dhe i pastër, pasi njihet më parë me të.
“Rey është vetëm 18 vjeç dhe mbase është rrëmbyer, pasi shokët e skuadrës ia kanë përcjellë gabim atë çfarë De Biazi ka thënë. Në fakt, De Biazi ka thënë realitetin, pasi s’mund të grumbullosh një lojtar se dërgon “sms” në telefon. Është diçka e vertetë. Ndërkohë që, po ashtu, është e vertetë se Manaj i ka dërguar një “sms” pas ndeshjes me Serbinë, ku i bënë të ditur se është i gatshëm për sfidën me Armeninë. Këtë e ka bërë nga dashuria e madhe që ka për Shqipërinë. Djali është shumë i ri dhe është nxituar në atë që ka thënë në Facebook, pasi më parë duhet të dinte saktësisht të vërtetën. Shumë shpejtë ai do të kontaktojë edhe De Biazin për t’i kërkuar falje për çfarë ka ndodhur. Unë e njoh mirë misterin, sepse kemi punuar 4 vite te Torino. De Bazi është një njeri i logjikshëm edhe në momente nervozizmi.”
