Melania Trump ka surprizuar Hollywood-in dhe botën politike, duke njoftuar krijimin e kompanisë së saj të prodhimit filmik Muse Films.
Gjithashtu ajo paralajmëroi dhe dokumentarin e shumëpërfolur mbi jetën e saj, i cili mbështetet nga një marrëveshje me vlerë 40 milionë dollarë me Amazon.
Në një postim në platformën “X”, zonja e parë e SHBA publikoi logon zyrtare të kompanisë dhe një promo 10-sekondësh të dokumentarit me titull “Melania”, që do të shfaqet ekskluzivisht në kinematë në mbarë botën më 30 janar 2026.
Videoja promovuese shfaq një logo elegante “M” në të zezë dhe ngjyrë argjendi, duke sinjalizuar hyrjen e saj në botën e filmit, shkruan Daily Mail.
“Prezantojmë: MUSE FILMS. Kompania ime e re e prodhimit. MELANIA, filmi, ekskluzivisht në kinematë në mbarë botën më 30 janar 2026”, shkroi Melania.
Në film priten të shfaqen edhe Presidenti Donald Trump dhe djali i tyre Barron.
Sipas raportimeve, marrëveshja me Amazon është arritur në fund të vitit të kaluar, disa javë përpara inaugurimit të Donald Trump. Ky konsiderohet investimi më i madh i Amazon në një dokumentar deri më sot.
Gjatë një interviste në Fox & Friends, Melania tha se xhirimet nisën në nëntor dhe dokumentari pasqyron jetën e saj të përditshme, përgjegjësitë dhe përgatitjet për rikthimin në skenën publike.
“Kisha dëshirë të bëja një film për jetën time, ndaj i kërkova agjentit tim të më siguronte marrëveshjen”, theksoi ajo.
