Ministri i Ekonomisë i Meksikës, Ildefonso Guajardo, ka paralajmëruar se vendi i tij do t’i prishë negociatat për Marrëveshjen për Tregti të Lirë të Amerikës Veriore (NAFTA), nëse Shtetet e Bashkuara propozojnë tarifa për produktet meksikane, raporton Bloomberg.
“Në momentin që ata thonë ‘Ne do të vendosim një tarifë prej 20 për qind për makinat’, unë do të çohem nga tavolina e bisedimeve,” ka thënë Guajardo për Bloomberg, transmeton Express. Presidenti i SHBA-së, Donald Trump, është zotuar se do ta fundosë NAFTA-n, akordin tregtar të vitit 1994, në të cilin janë të përfshira vendet si Kanadaja, nëse nuk mund ta rimodelojë atë në të mirë të interesave të SHBA-së, duke e rritur rrezikun për një tronditje ekonomike për Meksikën.
Meksika, e cila është duke u përgatitur që të diskutojë ndryshimet në disa rregulla të marrëveshjes së NAFTA-s, megjithatë e ka shprehur besimin se Trump nuk do të jetë në gjendje të vendosë barriera të ashpra ndaj importeve tani për tani. Zyrtarët meksikanë presin që negociatat të fillojnë në qershor të këtij viti, citohet “Express”. (b.an)
