Ish-Presidenti i Republikës, Rexhep Meidani mendon se zgjidhja më e mirë për dekriminalizimin e Parlamentit është që vendi të shkojë sërish në zgjedhje si ato të përgjithshme ashtu dhe vendore.
Në një intervistë për gazetën “Panorama”, Meidani kërkon nga kreu i PS Edi Rama, të kërkojë të paktën falje për situatën e krijuar në PS me elementët e kriminalizuar, të cilët kanë qenë përzgjedhje e tij.
Sipas ish-kreu të shtetit situata e krijuar është përgjegjësi personale të kryetarit të Partisë Socialiste për përfshirjen në listat e deputetëve të individëve me të shkuar kriminale, duke njollosur në këtë mënyrë jo vetëm emrin dhe historinë e grupit parlamentar socialist, por dhe parlamentit shqiptar.
“Së pari, duke ndryshuar thellësisht konceptimin ligjor, etik e moral dhe praktikën përkatëse! Aq më tepër që po rezultojnë shumë false të gjitha deklaratat e bëra nga Kryeministri apo që po vazhdojnë të bëhen, ende sot, nga të gjitha palët. Në gjykimin tim, krahas procesit parlamentar-ligjor të dekriminalizimit, që duhet të jetë sa më bashkëpunues dhe me shpirt konsensusi, duhet të ecet me shpejtësi edhe në procesin politik-partiak, me rregullime statutore e strukturore për shmangien që në embrion të kësaj situate përfaqësimi që na bëri “gaz të botës”¬ thekson Meidani.
Sipas tij, krahas proceseve me përmbajtje juridike (legjislative e statutore), nevojiten dhe disa hapa më të shpejtë.
