Që të gjesh një deklaratë apo shkrim që ish-presidenti i fundit socialist Rexhep Meidani, ka bërë kundër të djathtës, duhet të lodhesh jo pak. Për vite të tëra, qysh se ka lënë postin, ai është marrë me partinë e tij. Me shkrime, deklarata publike, opinione dhe qëndrime të hapura ose të kamufluara.
Më saktë, është marrë me PS e Edi Ramës, megjithëse ky i fundit ka qenë i kujdesshëm që të mos përplaset publikisht me Profesorin. Afrimi me Metën, pas vitit 2009, i solli Meidanit jo vetëm një vend pune të mirë për të birin, por e armiqësoi edhe më tej me Ramën.
Çka nuk ka ndryshuar as sot, kur edhe Rama, edhe Meta, janë aleatë dhe qeverisin vendin. Meidani e ka kritikuar në orët e fundit kreun socialist, se po kërkon votat, në stilin e pushtetit të dikurshëm sovjetik. Sipas tij, të gjithë votat rilindasve, do të thotë “gjithë pushtetin sovjetëve”.
Megjithëse ndodhemi në fushatë, ku zakonisht kërkohen sa më shumë vota nga të gjitha anët, Meidani bën sikur nuk e kupton domethënien relative të thirrjes së Ramës, por merret me paralelizma qe veçse shfaqin inatin e tij aspak të fshehur ndaj atyre që sot janë në pushtet. Dhe që janë ende (formalisht) “të tijët”…
